„Ég held að það myndi enginn meiðast af því að aflýsa Þjóðhátíð. Ósköp einfaldlega vegna þess að á þessum stöðum þar sem menn drekka áfengi þá minnka hömlur og þegar hömlur minnka verða meiri og meiri líkur á þeirri tegund samskipta sem getur leitt til smits.“
Þetta segir Kári Stefánsson, forstjóri Íslenskrar erfðagreiningar í samtali við Fréttablaðið um nýtt ástand í faraldrinum hér á landi. Hann segir að 99,5% þeirra sem smitast og eru bólusettir veikist ekki alvarlega. Hann segir engu að síður tilefni til þess að skoða aðgerðir hérlendis vegna fjölda smita innanlands.
„Tölfræðilega séð lítur þetta út þannig að fyrir bólusetningu lentu 5% þeirra sem smituðust á Íslandi á spítala. Við erum núna með bóluefni sem veita svona upp undir 90% vörn. Þannig má reikna með því að 0,5% lendi á sjúkrahúsi og tölurnar fram til dagsins í dag passa við það,“ segir Kári.
„Síðan á þetta eftir að komast upp í eldri hópana og þá sem eru veikir fyrir þannig ég hugsa að lágmarkið sé að það verði 0,5% en það gæti verið meira,“ segir Kári
„Við hljótum að vega þetta og meta á hverjum degi. Það er að segja hvað er þetta orðið alvarlegt vandamál fyrir þá sem sýkjast? Og ég held að við hljótum að velta fyrir okkur þeim möguleika að taka aftur upp grímuskyldu innanhúss, eins og menn hafa nú þegar gert í Ísrael og í Kaliforníu,“ segir Kári.
Viðtal Fréttablaðsins við Kára Stefánsson um faraldurinn.