Edda Björgvinsdóttir leikkona segir að stærstur hluti íbúa höfuðborgarsvæðisins vilji minnka mengandi bílaumferð og búa til fleiri göngugötur.
Edda gerir frétt Morgunblaðsins frá því í vikunni að umtalsefni en þar var vísað í niðurstöður könnunar sem Maskína gerði. Samkvæmt þeim segist stærstur hluti íbúa á höfuðborgarsvæðinu andvígur því að Laugavegur, Bankastræti og Skólavörðustígur verði gerðar að göngugötu allt árið um kring.
Þessu svarar Edda með eftirfarandi orðum:
„NEINEINEINEI þetta er ekki satt!!! Stærstur hluti íbúa á höfuðborgarsvæðinu vill minnka mengandi bílaumferð og búa til fleiri göngugötur. Hversu langt er hægt að ganga í heimskulegu bulli? Reynsla um allan heim sýnir að göngugötur laða að fólk og efla verslun. Allsstaðar! Hér í miðbænum okkar hefur ALDREI verið jafn blómlegt mannlíf og nú. Það er löngu liðin tíð að heimta forgang einkabílsins,“ segir hún.
Mjög skiptar skoðanir eru um lokanir gatna í miðborginni. Verslunareigendur eru margir hverjir mótfallnir þeim á meðan aðrir vilja betra aðgengi að miðbænum fyrir ökutæki. Umrædd könnun Maskínu var gerð fyrir Miðbæjarfélagið dagana 3. – 12. mars. Niðurstöðurnar gáfu enn fremur til kynna að stór hluti íbúa teldu sig ólíklegri til að heimsækja miðborgina ef af áðurnefndum lokunum yrði.