Dóra Ólafsdóttir frá Sigtúnum á Kljáströnd í Suður-Þingeyjarsýslu fagnar 108 ára afmæli sínu í dag. Dóra er elsti núlifandi Íslendingurinn en hún fæddist þann 6. júlí árið 1912.
Morgunblaðið fjallar um þetta í dag og greinir frá því að sjálfur ritstjórinn, Davíð Oddsson, hafi heimsótt Dóru á dvalarheimilið Skjól í Reykjavík um helgina en hún mun vera elsti áskrifandi blaðsins.
„Ég var einmitt að lesa Staksteina þegar þið komuð, mér líkaði það vel,“ hefur Morgunblaðið eftir Dóru en Davíð kom með blómvönd og þakkaði henni tryggðina við Morgunblaðið. Þá tilkynnti Davíð henni að hér eftir fengi hún blaðið frítt.
Í samtali við blaðið segist hún enn standa í fæturna þegar hún er spurð um heilsufarið, þó sjónin og heyrnin sé farin að daprast. Dóra styttir sér stundir með bóka- og blaðalestri.
Alls eru 60 Íslendingar 100 ára eða eldri og hafa þeir ekki verið fleiri, að sögn Jónasar Ragnarssonar sem heldur úti vefnum Langlífi. Næstelsti Íslendingurinn er Nanna Franklínsdóttir á Siglufirði en hún er fædd árið 1916.