Dóra Björt Guðjónsdóttir, borgarfulltrúi Pírata, segist ekki hafa verið að hvetja fólk til að lykla bíla í færslu sem hún skrifaði á Twitter í gær.
Færslan Dóru vakti nokkra athygli en í henni sagði hún:
„Fleiri sem fantasera í leyni um að lykla bíla sem lagt hefur verið ólöglega uppi á gangstétt? Spyr fyrir vin.“
Færslunni fylgdi skoðanakönnun þar sem boðið var upp á svarmöguleikana „já“ og „nei“. Þegar þetta er skrifað hafa 106 greitt atkvæði og segist rúmt 61 prósent þátttakenda deila þessari fantasíu.
Erna Ýr Öldudóttir, fjölmiðlakona á Útvarpi Sögu, gagnrýndi Dóru Björt í kjölfarið og sagði: „Pínu ábyrgðarlaust stöðu þinnar vegna að vera opinberlega að gæla við hugmyndir um skemmdarverk, og það er mjög vandræðalegt að þurfa að benda þér á það.“
Dóra Björt svaraði að bragði og sagði: „Það væri óskandi að þú beittir tilgerðarlegu móðgunargirninni sem þú beitir fyrir einkabílinn jafn skipulagt í þágu varnarlausa fólksins á flótta.“ Erna Ýr svaraði að ekki ætti að láta beina eða óbeina hvatningu til ofbeldis til að ná fram pólitískum markmiðum óátalda.
Fleiri blönduðu sér í umræðurnar í morgun og sagði einn þátttakandi í þeim: „Ó ég fantasera um svo margt sem ég hvorki framkvæmi né hvet annað fólk til að gera.“
Dóra Björt svaraði svo: „Akkúrat, að halda því fram að þessi skoðanakönnun á fantasíum fólks sé hvatning er náttúrulega grillað.“
Fleiri sem fantasera í leyni um að lykla bíla sem lagt hefur verið ólöglega uppi á gangstétt? Spyr fyrir vin.
— Dóra Björt (@DoraBjort) November 17, 2020
