Svo virðist vera sem forsvarsmenn Dominos hafi tekið ummæli Þórarins Ævarssonar, eiganda hins nýja pizzastaðar Spaðans, óstinnt upp, að minnsta ef marka má nýjustu Facebook færslu pizzakeðjunnar.
Í færslunni sem birtist rétt eftir klukkan tvö í dag segist keðjan ætla að gefa 790 brauðstangir. „Af hverju 790? Því það er einmitt verðið á stórum skammti á brauðstöngum og þó sumir muni verr en aðrir er þetta sama verð og í fyrra,“ stendur í færslunni og er blikkkall látinn fylgja.
Þarna er augljóslega brugðist við ummælum Þórarinsí samtali við Morgunblaðið í síðustu viku. Hann opnaði á dögunum Spaðann og hefur heitið því að bjóða allan sinn mat á sem lægsta verði, í stað þess að veita af og til afslátt eða vera með tilboð.
Sagði hann að sinn helsti samkeppnisaðili, Dominos, hefði strax brugðist við með lækkunum. Nefndi hann sérstaklega brauðstangirnar.
Sagði hann að brauðstangirnar hefðu kostað 1030 krónur á síðasta ári en síðar verið lækkaðar niður í 790 krónur eftir að það fréttist af opnun Spaðans.