Sett er spurningamerki við tímasetningu ákvörðunar Svandísar Svavarsdóttur heilbrigðisráðherra um að leyfa samkynhneigðum karlmönnum að gefa blóð í Staksteinum Morgunblaðsins í dag. Gera má ráð fyrir að þar haldi Davíð Oddsson ritstjóri á penna en þar segir:
„Skyndilegur áhugi heilbrigðisráðherra á Blóðbankanum í aðdraganda kosninga hefur kallað á harða gagnrýni yfirlæknis Blóðbankans sem finnst bankinn orðinn „leikmunur í einhverju kosningaleikriti“. Ekki er gott ef svo er, en það er því miður erfitt að verjast þeirri hugsun miðað við tímasetningar og lýsingar yfirlæknisins.“
Er rifjað upp að Svandís hafi lagt fram drög að breytingunum í byrjun þessa mánaðar og hyggst klára reglugerðarsetninguna áður en nýr ráðherra tekur við.
„Yfirlæknirinn hefur varað mjög við þeirri leið sem ráðherra vill fara og bendir meðal annars á að taka þurfi upp nákvæmari skimunaraðferð til að tryggja öryggi blóðþega,“ segir í Staksteinum.
„Þessum umbótum hafi ráðherra engan áhuga sýnt þó að þrenn fjárlög séu liðin frá því að Blóðbankinn fundaði með ráðherra um þessi mál.“
Er þá vitnað í orð yfirlæknisins sem telur þetta „algjörlega óverjandi“.
Kallað er eftir svörum frá Svandísi: „Ráðherra heilbrigðismála getur vitaskuld ekki gert blóðgjöf að kosningamáli sínu óháð öryggi blóðþega. Hafi ráðherrann rök sem hnekkja sjónarmiðum yfirlæknisins verða þau að koma fram.“