Dæmi eru um að grunlausir íbúar Danmerkur hafi fengið slæm brunasár eftir að hafa komist í snertingu við jurt eina sem farin er að dreifa verulega úr sér í Danmörku.
Um er að ræða gular nípur (d. gule pastinak) sem vaxa villtar í Danmörku en eins og flestir vita er um að ræða matjurt sem er náskyld gulrótum. Nípurætur þykja herramannsmatur en það borgar sig að fara að öllu með gát þegar sjálf plantan er meðhöndluð enda gefur hún frá sér efni sem getur valdið slæmum sárum á húð.
Fjölmiðlar í Danmörku hafa að undanförnu fjallað nokkuð um útbreiðslu jurtarinnar og segir Jens Reddersen, þjóðgarðsvörður í Mols Bjerge, að hún hafi dreift sér hægt og rólega á undanförnum árum. „Hún er útbreiddust á austurhluta Jótlands en hún er hér og þar í öllum landshlutum,“ segir hann við TV2.
Það getur verið sérstaklega varasamt að vera lengi í beinu sólarljósi ef eitrið kemst í snertingu við húðina. Eru dæmi þess að einstaklingar hafi fengið slæmar blöðrur og sár sem líkja mætti við afleiðingar annars stigs bruna. Jurtin er auðþekkjanleg á gulum blómum en komist einstaklingar í snertingu við eitrið þarf að skola húðflötinn vandlega og forðast sólarljós í tvo sólarhringa.
Jens segir að Danir þurfi ekki að örvænta þó plantan sé farin að dreifa sér um Danmörku. Þó sé gott að þekkja jurtina og helst forðast að komast í beina snertingu við hana.
Á Vísindavefnum er fjallað um hættulegar jurtir og er einna helst bent á risahvönnina í því samhengi enda er hún nokkuð þekkt hér á landi. Safinn úr þeim getur valdið ljósertiexemi líkt og jurtin sem fjallað er um hér að ofan. Þá er bent á aðrar plöntutegundir sem geta gert húðina viðkvæma. Má þar nefna hvannir, nípur, stöngla og blöð gulróta, steinselju og ýmsar sóleyjar svo dæmi séu tekin.
Myndin hér að ofan er af vef BT í Danmörku en í umfjölluninni kemur fram að nemandi við skóla einn á Sjálandi hafi fengið mjög slæm sár á höndina eftir að hafa snert jurtina.