„Það er mikið af munntóbaksbréfum um allt hérna og svo er fólk búið að vera að kúka og skilja eftir klósettpappír um allt.“
Þetta sagði Dagur Torfason, landeigandi í Skagafirði, í kvöldfréttum Sjónvarps í gærkvöldi. Þar var fjallað um Fosslaug og slæma umgengni á svæðinu að undanförnu sem líklega má rekja til Íslendinga – enda afar fáir ferðamenn verið á landinu undanfarna mánuði.
Hreinsað var upp úr lauginni árið 2011 sem er um 40 gráðu heit og því hentug til baðferða. Aðgangur í laugina er ókeypis. Dagur segir að sóðaskapur á svæðinu hafi ekki verið vandamál fyrr en nú sem líklega megi rekja til vaxandi vinsælda laugarinnar. Um hundrað manns heimsækja hana á hverjum degi, að sögn Dags.
Dagur útilokar ekki að fylla hreinlega upp í laugina ef umgengnin á svæðinu skánar ekki. Hann ætlar þó að sjá hvort umfjöllun um málið hafi eitthvað að segja. „Annars verður bara sett mold í laugina og sáð yfir,“ segir hann.
Mynd: Skjáskot úr kvöldfréttum RÚV