Daði Freyr og félagar hans í Gagnamagninu eru um þessar mundir staddir í Rotterdam í Hollandi fyrir Eurovision en fyrra undanúrslitakvöldið er næstkomandi þriðjudag. Íslenska liðið stígur þó ekki á stokk fyrr en á seinna undanúrslitarkvöldinu næstkomandi fimmtudag.
Gagnamagnið hefur verið að gera gríðarlega góða hluti úti og hafa heillað blaðamenn upp úr skónum. Í færslu sem Daði birtir á Twitter vísar hann til þess að þau hafi nú verið úti í eina viku og birtir þar mynd af sér þar sem hann sést stilla sér upp fyrir framan blaðamenn.
Eins og staðan er í dag er íslenska liðið í fjórða sæti í veðbönkunum og er þar sagt að það séu 8 prósent líkur á að Ísland vinni keppnina. Ítalía er nú í fyrsta sæti með 21 prósent vinningslíkur, Frakkland í öðru með 20 prósent vinningslíkur, og Malta í þriðja sæti með 12 prósent vinningslíkur.
Nánast öruggt er að Ísland komist áfram í lokakeppnina á fimmtudaginn, eða 92 prósent líkur. Áhugavert verður að sjá hvað íslenska liðið gerir þegar það stígur loksins á stokk í næstu viku.