Inniliggjandi sjúklingur á blóð- og krabbameinslækningadeild Landspítala (11EG) fékk jákvætt svar við Covid-19 skimun um klukkan 20 í gærkvöldi.
Í tilkynningu frá spítalanum segir að blóð- og krabbameinslækningadeild hafi því verið lokað fyrir nýjum innlögnum, en er þó í fullri starfsemi. Um 30 sjúklingar og 20 starfsmenn verða skimaðir núna í morgunsárið og ættu fyrstu niðurstöður úr þeirri skimun að liggja fyrir um miðjan dag.
„Viðkomandi einstaklingar eru ýmist í sóttkví eða vinnusóttkví B þar til þær niðurstöður berast. Samhliða hefur verið gripið hefur verið til ítrustu sóttvarnaaðgerða á deildinni.“
Ekki liggur fyrir hvernig sjúklingurinn smitaðist, en þó er talið líklegast að sjúklingurinn hafi þegar við innlögn verið smitaður. Smitrakning stendur yfir. Í tilkynningu frá spítalanum í morgun er áréttað að vegna þess hversu stutt sjúklingurinn lá á deildinni, þá leiki enginn grunur á smiti í sjúklingum eða starfsfólki.
Sjúklingurinn var lagður inn á 11EG síðdegis á þriðjudag og leiddi skimun í ljós virkt Covid-19 smit á níunda tímanum í gærkvöldi. Sjúklingurinn hefur verið fluttur á smitsjúkdómadeild Landspítala (A7) í Fossvogi og settur í einangrun, vegna veikinda sinna.
Rúmur sólarhringur er síðan Landspítali þurfti að grípa til svipaðs viðbragðs vegna smits sem kom upp á hjartadeild.
„Þetta eru alvarlegir atburðir í starfsemi spítalans og viðbragðið í kjölfarið því ætíð umfangsmikið og útbreitt. Aðrar deildir munu aðstoða 11EG eftir þörfum og vonir standa til þess að þjónusta spítalans við þennan viðkvæma sjúklingahóp verði órofin og hnökralaus.“