Bubbi Morthens er niðurbrotinn og orðlaus vegna talningaklúðursins í Alþingiskosningunum í ár. Hann segist aldrei hefðu trúað því að þetta gæti farið svona í kosningum hérlendis.
„Þetta er orðið algjört … aumingjaþjóðfélag. Ég hef trúað ýmsu upp á Íslendinga en ég hefði ekki trúað því að óreyndu uppá okkur að við gætum ekki haldið kosningar í þessu samfélagi. Ég verð að segja það. Ég er niðurbrotinn.“
Þetta hefur Vísir eftir tónlistarmanninum. Hann segist hafa séð eitt og annað, tal um spilingu, einkavinavæðingu. „En ég hefði aldrei trúað að þetta myndi raungerast með þessum hætti. Hélt að kosningarnar væru eitthvað sem mætti treysta.“
Hann segir ótrúlegt að menn tali um að brjóta lög þar sem hefð sé fyrir því. „Hvar annars staðar í hinum siðmenntaða heimi nema á Íslandi kæmi svona fram og það er ekki einn þungavigtarmaður í íslenskri pólitík þannig séð sem stígur fram og segir: Þetta er ekki boðlegt. Það þarf að kjósa aftur og ég er búinn að missa trúna á hvernig við stöndum að kosningum. Ég á ekki orð, þó að ég sé með eitthvað gaspur. Ég eiginlega orðlaus.“
Hentar stjórnarflokkunum að sega ekkert?
Þá spyr Bubbi sig hvers vegna stjórnarflokkarnir tjái sig ekkert um málið.
„Og enginn stígur fram nema gamli karatemeistarinn Karl Gauti Hjartason sem kærir! Að formenn flokkanna hafi ekki stigið fram og sagt, þetta er ekki í lagi, það slær mig illa. Þá fer maður að hugsa: Eru þau bara kampakát og glöð með þetta? Af því að það hentar í það skiptið?“
