Brynjar Níelsson, þingmaður Sjálfstæðisflokks, fer mikinn á Facebook-síðu sinni í pistli þar sem hann fjallar um orð Gísla Marteins Baldurssonar, fyrrverandi borgarfulltrúa Sjálfstæðisflokks, um skilningsleysi íhaldsmanna á hinu svokallaða góða fólki.
„Gamli flokksbróðir minn, Gísli Marteinn, fór mikinn á Tvitter fyrir stuttu þegar hann kvartaði sáran yfir skilningsleysi íhaldsmanna á woke fólki sem hann segir frjálslynt fólk sem berjist fyrir mannréttindum og gegn Brexit. Woke fólkið, eða góða fólkið eins og það er stundum nefnt, þarf að halda vöku sinni gegn þessu vonda íhaldi. Mátti helst skilja á Gísla Marteini að allir þeir sem ekki vilja vera í ESB væru forpokaðir íhaldsmenn og stæðu gegn mannréttindum og alþjóðasamstarfi,“ skrifar Brynjar.
Vandamálið segir Brynjar þó vera „að þetta woke lið er ekkert frjálslynt og örugglega ekkert betra en annað fólk.“ Hann segir umburðarlyndi óhjákvæmilegan fylgifisk þess að aðhyllast frjálslyndi en lítið fari fyrir því hjá woke fólkinu þar sem margir sem hópnum tilheyra séu uppfullir af pólitískri rétthugsun, „sem er annað orð yfir ofstæki,“ að hans mati.
„Því finnst að mannréttindi, ekki síst tjáningarfrelsið, snúist bara um þeirra skoðanir og athafnir. Sjálfhverfan er algjör. Því finnst allt leyfilegt í nafni eign réttlætis, jafnvel víkja til hliðar reglum réttarríkisins,“ skrifar Brynjar.
„Hæfileg íhaldssemi og hófleg þjóðerniskennd er lykillinn að stöðugleika, farsæld og framþróunar hvers samfélags. Það dugir þó skammt ef frelsi einstaklingsins er ekki i hávegum haft sem og frelsi í viðskiptum. Því er alþjóðasamstarf mjög mikilvægt enda byggist velferð hvers samfélags á því hvað við getum selt öðrum. Þetta vitum við sem stundum eru uppnefndir sem íhaldsmenn og ekki fastir í búbblu upp í Efstaleiti.“
Þá næst beinir Brynjar spjótum sínum að Ríkisútvarpinu og færslu Gísla Marteins á Twitter um andstöðu fólks við starfsemi þess.
Það segir mjög mikla sögu um mikilvægi Rúv hvað fólkið með allar verstu skoðanir landsins hatar stofnunina mikið.
— Gísli Marteinn (@gislimarteinn) July 25, 2021
Alveg einsog hjá öfgahægri flokkum í Evrópu, vill þetta fólk ekki leggja almannaútvarpið niður - það vill bara breyta því hvaða skoðanir heyrast þar og hverjar ekki.
„Það er einkennandi fyrir woke fólkið að líta svo á að þeir sem eru með aðrar skoðanir sé hatursfólk. Ég hata ekki RÚV þótt ég telji það úrelt í núverandi mynd og telji ekki forsvaranlegt að láta almenning greiða marga milljarða á ári svo vinir og vandamenn þar geti verið á einkaflippi og farið einungis að lögum þegar hentar. Ég hata heldur ekki ÁTVR þótt ég telji það úrelt kompaní og að smásöluverslun sé betur fyrir komið hjá einkaaðilum, eins og annar samkeppnisrekstur,“ skrifar Brynjar.
„Ég ætla ekki að halda því fram að Gísli Marteinn sé uppfullur af hatri en skrif hans bera greinileg merki um mikla andúð og óþol gagnvart andstæðum skoðunum. Slíkt fólk getur ekki skreytt sig með fjöðrum frjálslyndis. Ef það er ekki beinlínis ofstækisfullt þá er það að minnsta kosti stíflað af frekju,“ skrifar hann að lokum.