Brynjar Níelsson, þingmaður Sjálfstæðisflokksins, segist hafa orðið fyrir miklum vonbrigðum með bók Einars Kárasonar um athafnamanninn Jón Ásgeir Jóhannesson.
Bókin sem um ræðir, Málsvörn, kemur út á morgun en um er að ræða einskonar uppgjör Jóns Ásgeirs við hrunið og eftirmála þess. Einar Kárason skrifar bókina.
Brynjar tekur fram að hann hafi ekki lesið bókina en hann segist hafa séð á einhverjum vefmiðlinum að nafn hans er ekki að finna í nafnaskrá bókarinnar. Vísir birti í gær nöfn helstu persóna og leikenda í bókinni og vísað í nafnaskrá bókarinnar og þar er ekki að finna nafn Brynjars.
„Ég, sem sat við hliðina á Jóni Ásgeiri vikum og mánuðum saman í réttarsal í Baugsmálinu og var verjandi frænda flugstjórans frækna, sem lenti þotunni á Hudson ánni. Veit að sumir eru lítt áhugaverðir en er þetta ekki einhvers konar met?“
Brynjar var verjandi Jóns Gerald Sullenberger í Baugsmálinu eins og margir muna, en upphaf málsins má rekja til kæru Jóns Geralds á hendur Jóni Ásgeiri.
Brynjar er þekktur fyrir að bregða á leik á Facebook og hefur færslan komið ófáum vinum Brynjars til að brosa. Einn segir: „Sárt ertu leikinn Sámur fóstri“ og því svarar Brynjar með þessum orðum: „Já, mun aldrei aftur tala við Einar og Jón.“