„Einhverra hluta vegna hefur alltaf verið auðvelt að fá þekkta einstaklinga úr lista og menningarlífinu til að verja vondan málstað,“ segir Brynjar Níelsson, þingmaður Sjálfstæðisflokksins, í pistli á Vísi.
Þar skrifar Brynjar um stjórnarskrármálið svokallaða, en eins og margir lesendur hafa tekið eftir hefur staðið yfir herferð þar sem almenningur leitar að nýju stjórnarskránni sem samin var af stjórnlagaráði árið 2011 og þjóðin samþykkti. Brynjari finnst lítið til þessarar herferðar koma.
„Nú í sumar er mikið lagt undir til að afla stuðnings og áherslan er á ungmenni sem voru á bilinu 7-11 ára þegar þetta plagg var rissað upp í flýti um sumar seint í ágúst 2011 þegar þjóðin var í sárum í kjölfar bankahrunsins. Líklegast er til árangurs er að nota samfélagsmiðla unga fólksins og fá fræga fólkið til liðs við sig,“ segir Brynjar.
„Sýndarmennskan æpir á mann í þessum myndböndum, auk þess að vera uppfull af staðreyndavillum og vanþekkingu. Jafn neyðarlegt að horfa á þau og afhendingu Grímuverðlauna – svo mikið að mann langar helst að hoppa ofan í bjútíboxið,“ segir Brynjar sem hefur ákveðin skilaboð til unga fólksins:
„Þessi „nýja stjórnarskrá“ væri ekki góð fyrir land og þjóð og að sumu leyti mjög skaðleg. Hún er samin af fólki sem hvorki hafði reynslu né þekkingu til að skrifa stjórnlög eða meta hvaða afleiðingar einstök ákvæði gætu haft. Enda fór það svo að sérfræðingar í Feneyjarnefndinni töldu plaggið ekki tækt sem stjórnarskrá í þeirri mynd sem stjórnlagaráðið skilaði af sér. Má ætla að nýja símaskráin, sem einhverjir hafa verið að spyrjast fyrir um, væri gagnlegri,“ segir Brynjar meðal annars.
Lesa má pistil Brynjars í heild sinni hér.
