Brynjar Níelsson lenti í ótrúlegu atviki í líkamsræktinni í gær sem hann lýsir í smáatriðum í færslu á Facebook. Ferðin gekk aldeilis ekki þrautalaust fyrir sig.
Gefum Brynjari orðið: „Fór í ræktina í gær eftir margra ára hlé. Fékk sérkennilegar augngotur frá viðstöddum og mér leið eins og ég hefði troðið mér inni fegurðarsamkeppni óboðinn.“
Hann var heldur betur í góðra vina hópi í ræktinni: „Þegar ég hitti síðan Pál Magnússon og Tomma á Búllunni sá ég strax að þetta gat ekki verið slík keppni,“ segir Brynjar.
Að sjálfsögðu var tekin mynd af þeim félögum enda ekki á hverjum degi sem slíkur merkisatburður á sér stað.
Síðan dundu ósköpin yfir: „Mér gekk brösuglega með tækin. Byrjaði á hlaupabrettinu og datt þar auðvitað strax á hausinn. Það borgar sig ekki að glápa á aðra þegar maður er á hlaupabretti,“ segir Brynjar. Það fylgir þó ekki sögunni á hverja hann var að glápa.
Hann lét ekki bugast eftir byltuna á hlaupabrettinu og vatt sér í vöðvauppbygginguna: „Síðan fór ég í tæki til að styrkja vöðva hér og þar. Þurfti iðulega að létta lóðin umtalsvert frá fyrri notanda, jafnvel þótt það væru börn eða gamlar konur.“
Hann fékk það óþvegið frá geðþekkum útvarpsmanni og vaxtarræktarfrömuði: „Það koma að því að Ívar Guðmundsson, hinn snjalli einkaþjálfari og útvarpsmaður, vatt sér að mér og sagði að menn eins og ég byrjuðu gjarnan á Grensásdeildinni í nokkra mánuða þjálfun áður en þeir kæmu hingað,“ segir Brynjar.
Það er óhætt að segja að þessi ræktarferð hafi ekki gengið að óskum, en betur má ef duga skal.
