Brynjar Níelsson, aðstoðarmaður dómsmálaráðherra, lét sig ekki vanta á Lagadaginn sem er eins konar árshátíð lögfræðinga og lögmanna, og fór fram á föstudaginn.
Hann lýsir árshátíðinni með skemmtilegum pistli á Facebook er hann reyndi að dansa við eiginkonu sína.
„Ég fór á dansiball með Soffíu í gærkvöldi í fyrsta sinn í langan tíma, sem var hluti af Lagadeginum svokallaða, þar sem allir gáfuðustu lögfræðingar landsins koma saman og gera sér glaðan dag. Þarna voru stjörnulögmaðurinn og Gucci og Armani lögmaðurinn, sem var með sólgleraugu í myrkrinu, og allt upp í virðulega dómara á öllum dómstigum. Ég ætlaði að draga dómsmálaráðherra með mér sem hélt nu ekki. Hann væri nú kaffærður af lögfræðingum allan daginn í ráðuneytinu og ætlaði því ekki að eyða kvöldinu með slíku fólki,“ skrifar Brynjar á Facebook en hann hefur ítrekað kallað eiginkonu sína Arnfríði Einarsdóttur, landsréttardómara, Soffíu.
„Ég var með nokkurn kvíða fyrir dansiballinu. Ég hafði ekki farið í sparifötin í langan tíma. Einhverra hluta vegna pössuðu fötin illa og eina bindið sem ég fann var komið með myglu. En þrátt fyrir þetta mótlæti reimdi ég á mig dansskóna og ætlaði að snúa Soffíu hægri vinstri á dansgólfinu og taka alla gömlu stælana. En þegar tilkom var þrekleysið algjört og ég rétt hafði af einn vangadans með harmkvælum. Ég skrifa þetta á Lækna- Tómas sem skar úr mér hluta af lunganu í lok síðasta árs,“ skrifar Brynjar.
Undir færsluna skrifar vinkona Brynjars: „Það sem er á hana Soffíu lagt“ og svarar Brynjar um hæl: „Já, er ekki kominn tími til að hún fái Fálkaorðuna?“
