Brynjar Níelsson, fyrrverandi þingmaður Sjálfstæðisflokksins, kemur Katrínu Jakobsdóttur, forsætisráðherra og formanni Vinstri-grænna, til varnar á fésbókarsíðu sinni í dag.
„Reiði og heift er nokkuð áberandi hjá þeim sem telja sig vera betri, réttlátari og sanngjarnari en aðrir. Nú beinist reiðin einkum að Katrínu Jakobsdóttur, forsætisráðherra, og er henni ekki vandaðar kveðjurnar þótt hún hafi náð fram meira af stefnumálum vinstri manna en aðrir. Meira að segja pólitískum andstæðingum hennar, eins og mér, þykir nóg um þessar óvönduðu kveðjur,“ skrifar Brynjar.
„Að því að ég hef meira innsæi og er næmari á fólk en aðrir, og eru Bubbi, Illugi Jökuls og Hallgrímur Helga þar með taldir, get ég sagt ykkur heilmikið um Katrínu Jakobsdóttur. Það helsta að hún er afar geðsleg og umfram allt vel gefin, þokkalega skynsöm og með góða dómgreind þegar á reynir,“ bætir Brynjar við
Hann segir þó að Katrín sé alls ekki fullkomin. Hún er full brosmild og hress á köflum fyrir hans smekk og svo er hún allt of mikill sósíalisti að mati Brynjars.
„Sem er kannski ekki beinlínis galli en verður að teljast sérstakt miðað við aðra eiginleika. Þessi greining mín á forsætisráðherra er vísindalegri og nákvæmari en þeirra sem þykjast vita hvernig veðrið og hitastigið verður á jörðinni næstu hundrað árin og jafnvel lengur.“