Brynjar Níelsson, þingmaður Sjálfstæðisflokksins, segist hafa verið mjög hugsi í kjölfar fyrirspurnar sem hann fékk frá blaðamanni á dögunum.
Brynjar lýsir því í færslu á Facebook að hann hafi fengið tölvupóst frá blaðamanni sem spurði hann hvort hann ætlaði að láta bólusetja sig fyrir kórónuveirunni.
„Ég ákvað að láta því ósvarað enda um persónulegar heilsufarsupplýsingar að ræða. Blaðamaðurinn virtist heldur óhress með það og ítrekaði spurninguna. Þá svaraði ég með þjósti, eins og mér er einum lagið, og spurði hvurslags hnýsni þetta væri. Ekki lá á svari blaðamannsins og mér bent á að ég væri þjóðkjörinn og mátti skilja svarið þannig að slíkir menn hafi afsalað sér einkalífi.“
Brynjar þykist vita að blaðamaðurinn hafi sent sömu fyrirspurn á alla þingmenn. Ráðleggur hann honum að kíkja á persónuverndarlögin áður en svörin eru birt.
Brynjar hefur verið nokkuð áberandi í umræðunni um sóttvarnaraðgerðir yfirvalda að undanförnu og gagnrýnt þær þó nokkuð. Heldur minna hefur farið fyrir honum upp á síðkastið, enda ljóst að strangar aðgerðir yfirvalda hafa borið árangur og Ísland í betri stöðu í dag en flestar aðrar þjóðir.
Hef aðeins verið að velta fyrir mér síðustu misseri hvað felist í hugtökunum friðhelgi einkalífsins og tjáningarfrelsi....
Posted by Brynjar Níelsson on Miðvikudagur, 13. janúar 2021