„Hann má hafa sína skoðun á því. Ég hef engar áhyggjur af því. Ég var ekki að fara í eldrautt land eða á eldrautt svæði. Ég sinni mínum persónulegu sóttvörnum og mun fara í sóttkví þegar ég kem heim.“
Þetta segir Brynjar Níelsson, þingmaður Sjálfstæðisflokksins, í samtali við Vísi en hann er nú á heimleið frá Spáni þar sem hann hefur dvalið í tæpar tvær vikur hjá bróður sínum Gústafi Níelssyni, ásamt þriðja bróðurnum Guðlaugi Níelssyni.
Bræðurnir hafa notið lífsins á Spáni, skellt sér í golf og nældu sér í íslenskt páskalamb í gegnum tengiliði á meginlandi Evrópu. Brynjar greindi frá því á dögunum að hann hefði skellt sér í skimun í fyrsta sinn og sagðist hann rúmliggjandi af sársauka í kjölfarið, í gríni.
Sjá einnig: Brynjar fór í skimun í morgun: „Nánast rúmliggjandi af sársauka“
„Við getum sagt að það var ekki lífsnauðsynlegt eða mjög nauðsynlegt að ég færi í þessa ferð. En það var mikilvægt fyrir bræður mína að ég færi í þessa ferð á meðan ekki væri meiri hætta en þetta. Og ég fer í sóttkví þegar ég kem, þá sé ég ekkert að þessu,“ segir Brynjar.
Þórólfur Guðnason ítrekaði í gær beiðni til landsmanna um að ferðast ekki til útlanda að nauðsynjalausu. Brynjar segir að í ljósi veikinda í fjölskyldunni sé fríið ekki með hefðbundnu sniði. „Þetta er svo sem ekki auðvelt, því þú ert með svo mikla sjúklinga í kringum þig, en það er afslappandi að komast aðeins í burtu í hlýrra loftslag. Ég skal viðurkenna það.“
Nú er Lífsleikninámskeiðinu hinu meira lokið og bræður mínir og spúsur þeirra yfirgefa hinn sólríka Spán í dag og hefja...
Posted by Gústaf Níelsson on Thursday, 8 April 2021