Brynjar Níelsson, aðstoðarmaður dómsmálaráðherra, greinir frá því á Facebook að hann mun á morgun byrja í strangri sterameðferð.
„Ég muni verða uppstökkur og úrillur, fitna skart og gæti orðið soldið ofvirkur. Soffía sagði nú við lækninn að hún sæi nú ekkert nýtt í þessu nema þá ofvirknina og hún myndi fagna henni og vonaðist þá til að ég myndi gera loksins eitthvað,“ skrifar Brynjar en hann kallar iðulega Arnfríði eiginkonu sína Soffíu.
Hann segir hins vegar að það bætist grátt ofan á svart fyrir greyið eiginkonu sína að Gústi bróðir hans býr hjá þeim tímabundið.
„Bróðir minn, Gústaf, oftast nefndur okkar maður á Spáni, sem er talsvert eldri en ég, býr hjá mér um stundarsakir. Hann er þó yngri en halda má af myndum. Það tekur mjög á Soffíu að sitja með okkar báða á heimilinu í einu og það er örugglega ekki á færi nokkurs annars að lifa það af. Tveir ræningjar eru þó alla jafna auðveldari viðfangs en þrír. En við bræðurnir erum hálf heilsulausir og þarf því að hafa meira fyrir okkur en ella,“ skrifar Brynjar.
„Gústi er soldið spes, eins og sagt var um skrítna fólkið í gamla daga. Hann er að bíða eftir að komast í hjartaþræðingu en hann situr bara við tölvuna og passar sig á að hreyfa sig ekki neitt nema þegar hann á erindi í ísskápinn eða nammiskúffuna, sem er að vísu alloft. Allar bjórbirgðir heimilisins eru þrotnar en hann telur sig vera að bjarga verðmætum því bjórinn sé að renna út á tíma. Ég held að það verði mjög mikil áskorun fyrir lækna að þræða þetta hjarta,“ skrifar Brynjar.
„Eftir að hafa búið með Gústa í nokkra daga er ég enn sannfærðari en áður að sagan sé sönn um að pabbi hafi fundið hann í vöggu á ruslahaug í sígaunaþorpi á Ítalíu á sínum tíma,“ skrifar Brynjar að lokum.
