Líkt og fer ekki fram hjá neinum á sunnanverðu landinu er veðrið afar gott nú á þessari mestu ferðahelgi ársins.
Veðrið er einnig með besta móti víða annars staðar og hitinn á Bolungarvík fór í 21 gráðu síðdegis. Til að mynda var 24,2 gráðu hiti á Hjarðarlandi, 23,6 gráðu hiti á Þingvöllum og Árnesi, 23 gráður á Skálholti og 22 gráður á Hellu klukkan 15:00 í dag.
Hitinn í Reykjavík klukkan fjögur var 17 gráður og 20 gráður á Kirkjubæjarklaustri. Íbúar á Austurlandi hafa notið veðurblíðu stærstan hluta sumars en nú er staðan önnur og mældist hitinn á Egilsstaðaflugvelli 12 gráður klukkan fjögur.