Bogi Nils Bogason, forstjóri Icelandair, er sakaður um að hafa brotið lög eftir að hann sendi flugfreyjum og flugþjónum Icelandair tölvupóst þar sem fram komu upplýsingar um tilboð Icelandair til Flugfreyjufélags Íslands.
RÚV fjallaði um þetta í gærkvöldi, en Bogi er sagður hafa sent tölvupóstinn í gærkvöldi. Í frétt RÚV er haft eftir Guðlaugu Líney Jóhannsdóttur, formanni Flugfreyjufélags Íslands, að Bogi hafi með þessu gerst sekur um að brjóta lög um stéttarfélög og vinnudeilur.
Í frétt RÚV er Bogi sagður hafa útlistað með nákvæmum hætti hvað nýjasta tilboð Icelandair hafi falið í sér. Eins og fram hefur komið hafnaði Flugfreyjufélagið umræddu tilboði. Í umræddum tölvupósti segir Bogi að margt í umræðunni sé til þess fallið að skapa tortryggni gagnvart Icelandair.
Stjórn Icelandair þurfi að leiðrétta þennan misskilning og sýna hverjum sem er úr hópi flugfreyja og flugþjóna samningstilboðið í heild sinni.
