Sjónvarpsmaðurinn Bogi Ágústsson segir greinilegt að vilji Samherja til þess að biðjast afsökunar á ofbeldinu gegn Helga Seljan, Kveik og RÚV hafi greinilega ekki skilað sér til allra leigupenna fyrirtækisins.
Deilir Bogi þar skrifum Þóru Arnórsdóttur, ritstjóra Kveiks, sem skýtur föstum skotum að Páli Vilhjálmssyni og bloggfærslu hans um að Helgi Seljan hafi í raun játað sig geðveikan í þætti Gísla Marteins síðastliðið föstudagskvöld.
Sjá einnig: Páll ver skrif sín um Helga Seljan: „Opinber geðveiki veitir ekki afslátt frá gagnrýni“
Ljóst er að Boga er algjörlega nóg boðið. „Sá sem ræðst svo ódrengilega á Helga getur ekki bent á neitt sem farið er rangt með í umfjöllun Kveiks um Samherja. Fyrirtækið hefur reynt að biðjast afsökunar á ofbeldinu gegn Helga Seljan, Kveik og RÚV, sá vilji hefur greinilega ekki skilað sér til allra leigupenna fyrirtækisins. Samherji ætti að sjá sóma sinn í að biðja Helga afsökunar,“ skrifar Bogi.
Hann skrifar að síðustu:
„Á RÚV eru heiðarleiki, sanngirni og hlutlægni höfð í öndvegi, það væri óskandi að þau gildi væru virt í skrifum og umfjöllun um það sem gerum.“
