Björn Leví Gunnarsson, þingmaður Pírata, fer yfir viðbrögð Dómarafélagsins vegna boðaðrar leiðréttingu á launum þeirra vegna mistaka sem uppgötvuðust í síðustu viku og svör Bjarna Benediktssonar, fjármálaráðherra, í nýjum pistli í Morgunblaðinu í morgun.
„Dómarafélagið brást ókvæða við og kallaði boðaða leiðréttingu á launum þeirra „atlögu framkvæmdavaldsins að dómsvaldinu sem ekki á sér hliðstæðu í íslenskri réttarsögu“ og að allir gætu átt „von á því að framkvæmdavaldið geti lækkað laun dómara eftir eigin geðþótta“,“ segir Björn í pistli sínum.
Að sögn Björns brást Bjarni ókvæða við gagnrýni Dómarafélagsins og sagði málflutning þeirra auman og að hann hafi lokið svari sínu með því að segja: „Gjör rétt. Ávallt“.
„Fjármálaráðherra bætir í og spáir fyrir um málsvörn dómara og segir: „Ég vænti þess að þeir vilji bera fyrir sig að hafa tekið við of háum launum undanfarin ár í góðri trú.“ En finnst önnur rök yfirsterkari – nánar tiltekið að láta efsta lag ríkisins „skila því sem ofgreitt var úr opinberum sjóðum. Annað væri hrikalegt fordæmi og er ekkert minna en siðferðisbrestur,“ segir Björn jafnframt í pistli sínum og bætir við að honum þyki þetta svar koma úr hörðustu átt. „Hér verð ég hins vegar að segja að þetta kemur úr hörðustu átt.“
Það sé ánægjulegt að laun æðstu ráðamanna hafi loksins verið lækkuð enda hafi þau hækkað langt umfram almenna launaþróun með ákvörðun kjararáðs fyrir nokkrum árum.
„Þá fannst fjármálaráðherra óþarfi að gera rétt og leiðrétta þann mun. Sú ákvörðun varð afdrifarík þar sem það má skiljanlega rekja aukna hörku í kjaraviðræðum síðan til þess siðferðisbrests. Efsta lag ríkisins fékk þar meira en aðrir,“ segir Björn og heldur áfram: „Ef fjármálaráðherra hefur hins vegar vaxið samviska vegna þessa máls þá ætti hann kannski að skoða aðeins í baksýnisspegilinn og gera upp fyrri verk sín út frá því sjónarhorni.“
Að sögn Björns stöndum við frammi fyrir þeim vanda að lagalega hafi dómarafélagið líklega rétt fyrir sér í málinu, því þeir hafi tekið við ofgreiddum launum í „góðri trú“. Þannig verði yfirlýsingar og fyriráætlanir Bjarna um endurheimt ofgreiddu launanna að engu.
„Ég held að ráðherra viti það og vegna þess að ráðherra veit það þá er það rosalega ódýrt fyrir hann að heimta endurgreiðslu, sem mun aldrei gerast, af því að út á við lítur hann út fyrir að berjast fyrir réttlæti,“ segir Björn jafnframt í pistli sínum.
„Þannig að, hæstvirti fjármálaráðherra. Í anda þessa gamla orðatiltækis „put your money where your mouth is“, hvernig væri að byrja á því að líta í eigin barm? Þarf ekki að endurskoða ofgreiðsluna frá 2016 sem hefur hækkað laun þín um milljón á mánuði? Er flokkurinn þinn búinn að endurgreiða styrkina frá FL group og Landsbankanum? Gjör rétt. Er það ekki? Ávallt?“