„Enn á ný er hafin herferðin gegn nagladekkjunum sem orsaka eiga svifryksmengun í borg þar sem götur eru varla þrifnar mánuðum saman,“ segir Björn Ingi Hrafnsson, ritstjóri Viljans, í pistli á Facebook-síðu sinni.
Nú er kominn sá árstími að andstæðar fylkingar, annars vegar sú sem talar fyrir notkun nagladekkja og hins vegar sú sem talar gegn henni, skiptast á skoðunum. Björn Ingi tilheyrir fyrri hópnum.
Sjá einnig: Gísli Marteinn með særindi í hálsi vegna svifryks
„Borgarfulltrúar, búsettir í 101, botna ekkert í því að naglar séu settir á dekk, enda virðast þeir sjaldan fara upp fyrir Elliðaárnar eða keyra bíla yfirhöfuð. Við sem búið höfum í Seljahverfi eða efri byggðum Breiðholts, Árbæ, Grafarvogi eða Grafarholti vitum hins vegar að oft verða göturnar þar svo hálar að varla er hægt að komast áfram nema á negldum hjólbörðum,“ segir Björn Ingi og bætir við að þetta eigi líka við í mörgum hverfum Kópavogs, Garðabæjar og Mosfellsbæjar.
„Þetta vita líka þær þúsundir ökumanna sem búa fyrir austan fjall eða á Vesturlandi og sækja vinnu eða aðra þjónustu til höfuðborgarinnar. Það er alveg sjálfsagt að sem flestir séu á góðum heilsársdekkjum eða vetrardekkjum án nagla, en staðreyndin er að margir þurfa á þeim að halda öryggisins vegna,“ segir Björn Ingi og bætir við að þess vegna sé ekki hægt að banna nagladekk.
„Nema hita þá tilteknar götur bæjarins upp og sömuleiðis helstu þjóðvegi í nágrenni höfuðborgarinnar. Já eða fara að þrífa göturnar og gangstéttirnar almennilega, því það er ekki síst tjaran á götunum sem fer út um allt og er öllum til ama.“
Fréttablaðið sagði á dögunum frá því að Gísli Marteinn Baldursson, sjónvarpsmaður og fyrrverandi borgarfulltrúi, hefði verið með særindi í hálsi þegar hann gekk heim til sín vegna svifryksmengunar í borginni. „Mér finnst ekkert að því að banna nagladekk,“ sagði Gísli Marteinn.