„Þetta er að hafast, kæru landsmenn. Höldum þetta út. Missum ekki mannslíf á lokasprettinum sem hefði mátt vernda,“ segir Björn Ingi Hrafnsson, ritstjóri Viljans og höfundur bókarinnar Vörn gegn veiru.
Bretar tilkynntu í morgun, eins og Fréttablaðið greindi meðal annars frá, að þeir hefðu heimilað notkun bóluefnisins frá Pfizer/BioNTech gegn COVID-19. Bretar hafa keypt 40 milljón skammta af bóluefninu sem hefur 95 prósenta virkni gegn COVID-19. Er búist við því að hafist verði handa við að bólusetja breskan almenning strax í næstu viku en þá er ráðgert að Bretar verði búnir að komast yfir 800 þúsund skammta af efninu.
Björn Ingi gerir þessi merku tíðindi að umtalsefni á Facebook-síðu sinni auk þess sem fjallað er um málið á vef Viljans. Þar kemur fram að byrjað verði á því að bólusetja viðkvæmasta hópinn, eldri borgara, fólk með langvinna sjúkdóma og fólk sem starfar í framlínunni.
„Aldrei áður í sögunni hefur bóluefni verið þróað á jafn skömmum tíma, eða tíu mánuðum. Hingað til hefur jafnan verið miðað við að slíkt geti tekið allt að tíu árum,“ segir Björn Ingi sem hvetur þó landsmenn til að halda þetta út á lokasprettinum sem er að hefjast.