Fjölmiðlamaðurinn Björn Ingi Hrafnsson hefur verið dæmdur til að greiða þrotabúi Pressunar ehf. áttatíu milljónir króna. Landsréttur staðfesti niðurstöðu Héraðsdóms Vesturlands þess efnis í dag.
Þrotabú Pressunar höfðaði mál gegn Birni Inga og krafðist riftunar á tveimur ráðstöfunum sem hann hafði komið að sem lánveitandi Pressunar ehf. Héraðsdómur hafði áður fallist á kröfur Pressunnar ehf. um að veðsetningum á eignum félagsins, sem gerðar voru með lánssamningi milli Pressunnar ehf. og Björns Inga auk tryggingabréfs, yrði rift.
Dómsmálið hófst í kjölfar gjaldþrots Pressunnar, sem átti og rak eyjan.is, bleikt.is og 433.is auk þess sem félagið átti hlut í DV. Frjáls fjölmiðlun tók yfir eignir Pressunnar árið 2017 og inni í því var yfirtaka á 80 milljón króna skuldabréfi.
Björn Ingi sagðist hafa lánað Pressunni þá upphæð og átti að fá hana endurgreidda ári síðar, með allsherjarveði í Pressunni til tryggingar.
Þrotabú Pressunnar vildi hins vegar meina að Björn Ingi hafi ekki lánað téðar 80 milljónir og hafi tilbúin skuld verið yfirtekin með kaupsamningi Pressunnar ehf. og Frjálsrar fjölmiðlunar.
Björn Ingi sagði hins vegar í málsvörn sinni að það hafi blasað við í september 2017 að Pressan yrði gjaldþrota yrði ekkert gert. Tekist hafi að halda félaginu gangandi yfir sumarið með greiðslum frá sér í samræmi við lánssamning hans við Pressuna.
Þannig hafi hann í reynd fjármagnað félagið árum saman með lánum og persónulegum ábyrgðum þar sem hann þótti hafa meira lánstraust en félagið. Fór hann því fram á sýknu af kröfu Pressunnar.
