„Hrokinn, heimskan og yfirlætið virðast engum takmörkunum sett,“ segir Björn Birgisson, fisksali í Grindavík. Björn er þekktur í sínum heimabæ og víðar fyrir að liggja ekki á skoðunum sínum.
Björn gerir dóm yfirdeildar Mannréttindadómstólsins í Landsréttarmálinu að umtalsefni, en úrskurður féll íslenska ríkinu í óhag í gær. Brutum við í bága við ákvæði Mannréttindasáttmálans þegar dómarar voru ekki skipaðir við Landsrétt í samræmi við landslög.
Björn líkir Íslandi og Bandaríkjunum saman og segir að þar í landi sé skipun dómara hápólitísk.
„Hérlendis er skipun dómara alltaf sögð taka mið af reynslu og hæfni umsækjenda - og síðan skipa dómsmálaráðherrar Sjálfstæðisflokksins sína gæðinga í embættin. Hvort er verra? Tvímælalaust íslenska aðferðin.“
Björn bendir á að bandaríska aðferðin eigi ekkert skylt við lýðræðislegar venjur, um sé að ræða viðtekinn ósið sem er þó á engan hátt falinn.
„Hérlendis byggist ferlið á undirferli, lygum og blekkingum og nú hefur virtasti dómstóll veraldarinnar, Mannréttindadómstóll Evrópu, staðfest að svo sé. Viðbrögð sjálfstæðismanna? Það er ekkert að marka þann dómstól -hann er í pólitískri herferð gegn Sjálfstæðisflokknum og dómsmálaráðherrum hans!
Björn furðar sig á því að flokkurinn njóti mest fylgis í skoðanakönnunum.
„Og óþverrahátturinn nýtur stuðnings um 25% þjóðarinnar! Er nema von að sannir Íslendingar leyti margir hverjir út fyrir 200 mílurnar til að þurfa ekki að horfa upp á þessar sífelldu nauðganir á góðum stjórnsýsluháttum í eigin landi?“