Björk Guðmundsdóttir, söngkona, segir MeToo-málin í dag vera orðin að einskonar bókhaldsatriði. Það þurfi að skoða hvert mál fyrir sig, meta út frá ýmsum þáttum og ekki sé hægt að „aflýsa“ eða „ekki aflýsa“ öllum.
Þetta kemur fram í helgarviðtali Fréttablaðsins, þar sem rætt er við Björk.
Í viðtali frá árinu 2015 sagði Björk það nauðsynlegt að láta karla halda að þeir eigi góðu hugmyndirnar, en síðan eru liðin sjö ár og MeToo-hreyfingin breyst síðan þá.
„Maður er svolítið umkringdur fólki sem hugsar eins og maður sjálfur, sem er smá hættulegt stundum, en ég held að þetta sé samt skref áfram,“ segir Björk.
Þá segir Björk að MeToo umræðan hafi orðið svarthvít og að annaðhvort hafi menn verið englar eða skrímsli.
„Ef MeToo atriði kemur upp á vinnustað þá er þetta svona: Já, ókei. Hversu alvarlegt var þetta? Einhver fjörutíu atriði sem þarf að greina og vita hvernig á að bregðast við. Ekki alltaf bregðast eins við og ekki alltaf bara kansel eða ekki kansel. Heldur er þetta bara bókhaldsatriði,“ segir hún.
Björk segist vildi óska þess að hún gæti hringt í #Metoo lögguna. „Og hún myndi bara sjá um öll þessi mál. En sá lúxus er ekki í boði. Við verðum sjálf að setjast niður með kaffibolla og leysa úr þessu, mál fyrir mál fyrir mál. Og þannig þroskast saman í rétta átt,“ segir hún. „Þannig að stutta svarið er, á það heila er þetta að fara í rétta átt. Það verður bakslag þegar risaeðlan sveiflar halanum. En á heildina séð er skipið að snúa í rétta átt.“