Bjarni Benediktsson fjármálaráðherra segir að auglýsing Öryrkjabandalagsins, þar sem grín er gert að kökugerð Bjarna, sé misheppnuð. Þetta segir Bjarni í færslu á Facebook-síðu sinni.
Öryrkjabandalagið hefur bent á að nánast allir stjórnmálaflokkar hafi hafi átt aðild að ríkisstjórn frá 2007. Flestir tali fyrir bættum kjörum öryrkja en þrátt fyrir það haldi bilið milli lægstu launa og örorkugreiðslna áfram að aukast. Þannig verður munurinn orðinn 86 þúsund krónur um næstu áramót ef fer sem horfir.
Bjarni segir mikið áhyggjuefni að á örfáum árum hafi þeim sem eru á örorkubótum eða endurhæfingarlífeyri fjölgað um 4.300 manns. Bendir Bjarni á að það jafngildi íbúafjölda Vestmannaeyja.
„Okkur er að mistakast að ná utan um þennan vanda og verðum að bregðast við. Ég heyri ákall Öryrkjabandalagsins um að hækka bætur enn frekar. Myndband þeirra er hins vegar misheppnað, þótt kakan sé falleg eftirmynd af þeirri sem ég gerði. Það dugar ekki til, því það er rangt að öryrkjar fái sífellt minni sneið. Kakan hefur stækkað og almannatryggingar hafa fengið stærri sneið af stækkandi köku. Um það vitna staðreyndir,“ segir Bjarni í færslu sinni.
Bendir hann á að fjórir milljarðar hafi verið teknir til hliðar til að styrkja þessi kerfi enn frekar á þessu kjörtímabili. Enn sé um fjórðungi þeirrar fjárhæðar óráðstafað en um sé að ræða varanlega 4 milljarða hækkun á þessum lið almannatrygginga.
„Helsta áhyggjuefnið er að við munum ekki geta stutt nægilega við þá sem eru í mestri þörf ef við fáum sífellt hærra hlutfall landsmanna á örorku eða endurhæfingarlífeyri. Eftir því sem þessi staða versnar dregur úr getu okkar til að standa myndarlega við bakið á þeim sem aldrei fengu tækifæri í lífinu eða urðu fyrir áföllum og þurfa á stuðningi að halda.“
Það er mikið áhyggjuefni að á örfáum árum hafi þeim sem eru á örorkubótum eða endurhæfingalífeyri fjölgað um 4.300...
Posted by Bjarni Benediktsson on Miðvikudagur, 28. október 2020