Bjarni Benediktsson, fjármálaráðherra og formaður Sjálfstæðisflokksins, segir að góð samstaða hafi verið innan ríkisstjórnarinnar með aðgerðir gegn Covid-19 í viðtali í þættinum Dagmálum á mbl.is sem fjallað er um í Morgunblaði dagsins. „Oft hvöss skoðanaskipti, þó það nú væri!“ segir hann um umræðurnar innan stjórnarinnar og segir aðgerðirnar gegn faraldrinum tekist vel og Svandís Svavarsdóttir heilbrigðisráðherra notið góðs stuðnings.
Bjarni segir að það hafi verið jákvætt að efasemdir um aðgerðir í sóttvarnamálum hefðu verið innan raða flokks hans. „Við þurfum aðhald og eigum ekki að veigra okkur við að svara erfiðum spurningum,“ segir hann og segist vera á þeirri skoðun að betra hefði verið að vera laus við breytingar á reglum á landamærunum. Þær séu þó ekki mjög íþyngjandi eða umfangsmiklar.
Á mánudaginn var Svandís í viðtali í kvöldfréttum RÚV þar sem hún baunaði á Sjálfstæðisflokkinn vegna sóttvarnaaðgerða og andstöðu við þær innan flokksins. Bjarni segir að það hafi verið kosningaþefur af ummælum Svandísar. „Ég veit ekki alveg hvað heilbrigðisráðherra var að vísa í,“ segir hann.