„Ég tel að dæmin sem háttvirtur þingmaður nefnir hér því til stuðnings að það þurfi að hafa miklar áhyggjur af spillingu á Íslandi, sé nú heldur léttvæg,“ sagði Bjarni Benediktsson fjármálaráðherra í óundirbúnum fyrirspurnatíma á Alþingi í dag.
Logi Einarsson, formaður Samfylkingarinnar, spurði Bjarna þá út í stöðu Íslands á árlegum lista Transparency International um spillingu. Ísland fellur um sex sæti á listanum og situr nú í 17. sæti á listanum, langneðst Norðurlandanna.
„Meðal skýringa nefnir skýrslan bankahrunið, fjármálavafstur stjórnmálamanna í Panama-skjölunum og nú síðast Samherjamálið, einnig að spilling nái til opinberra aðila. Lái mér enginn þó að hugurinn reiki örstutt að Landsréttarmálinu,“ sagði Logi en Bjarni sagði að þetta væru nú heldur léttvæg dæmi um spillingu.
„Að kalla það mál spillingu í Landsréttarmálinu þegar öll gögn eru opin, þegar Alþingi kemur að málinu og tekur síðustu ákvörðunina, þegar embættismenn mæta fyrir nefndasvið og færa rök fyrir tillögu ráðherrans, þegar hér í þingsal eru greidd atkvæði fyrir opnum tjöldum. Að kalla afgreiðslu slíkra mála spillingu er auðvitað með miklum ólíkindum,“ sagði Bjarni sem sagði það skipta máli hvort menn líti svo á að glasið sé hálftómt eða hálffullt.
Logi sagði að þegar kæmi að aðgerðum stjórnvalda gegn spillingu vildi hann hafa glasið fullt.
„Og dæmin sem ég nefndi eru nefnilega alls ekki léttvæg. Ég nefndi bankahrun. Ég nefndi óeðlilegt fjármálavafstur stjórnmálamanna í tengslum við Panama-skjölin og ég nefndi Samherjaskjölin. Mig langar þá að nefna í samhengi við þessa skýrslu að nýlega birtist skoðanakönnun MMR sem sýnir að einungis 23% treysta fjármálaráðherranum til að halda utan um sölu á Íslandsbanka. Þetta er forvitnileg niðurstaða og það vakna óneitanlega spurningar.“
Bjarna fannst Logi skjóta fyrir neðan beltisstað og sagði að verið væri að fara út fyrir kjarna málsins þegar farið er að ræða niðurstöður skoðanakannana. Skaut hann létt á Loga og Samfylkinguna.
„Eða ættum við kannski að velta því fyrir okkur hér, myndi það skila okkur eitthvað fram veginn í þágu þjóðarinnar, hvers vegna það skyldi vera að 83–84% þjóðarinnar vilji ekki Samfylkinguna sem valkost við stjórn landsins. 83% segja bara nei þegar Samfylkingin býður fram, við kjósum eitthvað annað. Þetta er bara einhver þvæluumræða. Aðalatriðið er að við stöndum við það sem sagt hefur verið í bankasölumálinu, að fylgja opnu og gagnsæju ferli þar sem enginn er að flýta sér. Við stígum varfærin skref og fylgjum því sem boðað hefur verið, að allir geti tekið þátt sem hafa áhuga.“
Ég nefndi bankahrunið, fjármálavafstur stjórnmálamanna í panamaskjölunum, Samherjamálið og Landsréttarmálið. Dæmi nú hver fyrir sig hversu léttvæg þau eru. pic.twitter.com/NKDT2OaKj9
— Logi Einarsson (@logieinarsson) January 28, 2021
