Göngugarpurinn og hjartaskurðlæknirinn Tómas Guðbjartsson hefur birt uppfærða gönguleið sem sýnir það sem hann telur bestu leiðina að gosinu í Meradölum. Þetta kemur fram í frétt Fréttablaðisins.
Uppfærða leiðin sem Tómas vill vekja athygli á liggur frá suðurstrandavegi í norður að Fagradalsfjalli og leiðir svo niður í átt að Meradalshnjúk þar sem nýju gosstöðvarnar eru staðsettar. Leiðina teiknaði hann inn á kort sem hann hafði áður gefið út í samstarfi við Ferðafélag Íslands.
Leiðin hefur nú einnig verið stikuð af Björgunarsveitinni Þorbjörn svo auðvelt er að fylgja leiðinni bæði nótt og dag þar sem stikurnar eru útbúnar með gráu endurskini.
Kortið sem Tómas uppfærði var upprunalega unnið í samstarfi við Ferðafélag Íslands og sýndi þá gönguleiðir að gosinu í Fagradal.
Tómas segir að tilgangur kortsins hafi verið að auka öryggi þeirra sem vilja bera gosið augum en einnig til vekja athygli á þeim örnefnum sem leynast á svæðinu.
„En kortið var líka búið til í þeim tilgangi að beina fólki ákveðnar gönguleiðir svo gróðurinn myndi ekki skemmast. En kortið var unnið í samstarfi við landeigendur á Hrauni,“ segir Tómas en hann er mikill áhugamaður um göngur og útivist.
Kortið sem um ræðir er nú til á sex tungumálum og hægt að nálgast það á vef Ferðafélags Íslands hérna.
„það er svona QR kóði sem hægt er að nota til þess að nálgast PDF skjal á netinu. Svo treystum við bara því að fólk borgi þessa upphæð sem rennur áfram til góðs málefnis. Þá getur fólk borgað fyrir afnot af kortinu og hlaðið því inn á síma. Það er líka hægt að nálgast kortið á skrifstofu Ferðafélags Íslands eða í útivistar búðum," segir Tómas og tekur fram að nýjasta útgáfan verði svo birt á næstu dögum „þá fær fólk uppfærða útgáfu á símann í gegnum QR kóðann," segir hann.
Það sem ber þó að hafa í huga við val á gönguleiðum er að vindátt getur skipt miklu máli þar sem mikið gas og reyk leggur frá gosinu. „Gönguleiðin fer algjörlega eftir vindátt og þessi leið sem ég er að mæla með hún miðast við norðanátt“ segir Tómas og segir aðkomuna að gosinu mjög tilkomumikla ef þessi leið er farin “skilyrðin í þessari norðan átt eru alveg stórkostleg því þú getur setið þarna í brekku sem er bara eins og hringleikahús og horft undan vindi.“
Veðurstofa Ísland gaf nýverið út spálíkan fyrir gasmengun þar sem hægt er að kynna sér stefnu gasmengunar og þá vindátt sem verður ríkjandi. Hægt er að nálgast spá veðurstofunnar hér.
Tómas segir þó að ef sunnátt bresti á sé hægt að fara aðra átt sem liggur eftir Langahrygg og upp á Stóra-Hrút.
„Það er miklu meiri gashætta á ferðum í þetta skiptið þar sem þetta er bara miklu kröftugra gos“ segir Tómas en talið hefur verið að þetta gos sé í kringum 3-5 sinnum stærra en hið fyrra sem var við rætur Fagradalsfjalls.
Það sem er mikilvægt að hafa í huga
Tómas telur að mikilvægt sé að hafa ákveðin atriði í huga áður en haldið er af stað í átt að gosstöðvunum.
„Þetta er töluvert lengra en í fyrsta gosinu“ segir Tómas „Þá voru þetta svona fjórir og hálfur kílómetri sem ganga þurfti frá Suðurstrandavegi að góðum útsýnisstað til að sjá yfir stærsta gíginn. Núna þarftu að ganga töluvert lengra eða átta og hálfan eða níu kílómetra.“
Tómas bendir þá á að líkamlegt hreysti sé nauðsynlegt til að ganga þessa leið „þú þarft að vera sæmilegu formi til að fara þetta. Þetta er grýtt leið og þú ert að labba í hraunkantinum og þannig þarftu að passa þig að misstíga þig ekki eða pompa niður um hraunhellur.“
Annað sem Tómas segir að hafa verði í huga er klæðnaður „vera vel skóaður með húfu og vettlinga því í norðan áttinni þá verður mjög kalt þarna, sérstaklega um nótt,“ segir Tómas og bætir við " það er allt of mikið af fólki, þá sérstaklega útlendingum sem eru allt of illa búnir.
