„Við starfsmenn Vegagerðarinnar erum harmi slegin yfir slysinu og því að slíkar aðstæður hafi getað skapast við venjubundið viðhald á vegum,“ segir Bergþóra Þorkelsdóttir, forstjóri Vegagerðarinnar, í yfirlýsingu sem send var fjölmiðlum nú rétt fyrir hádegi.
Tilefni yfirlýsingarinnar er umræða um öryggi á vegum. Heiðrún Finnsdóttir, dóttir Finns Einarssonar sem lést vélhjólaslysi ásamt konu sinni, Jóhönnu Sigríði Sigurðardóttur, á Kjalarnesi í sumar, ræddi málið til dæmis í Kastljósi í gær og sagði hún að faðir hennar hefði haft miklar áhyggjur af lélegu malbiki á vegum landsins.
Sjá einnig: „Pabbi var mjög meðvitaður um þetta“
Í yfirlýsingu Bergþóru er meðal annars komið inn á hið hörmulega slys sem varð í júní síðastliðnum.
„Á umræddum vegarkafla var nýlokið viðhaldi á malbiksyfirborði og beindust sjónir strax að frávikum í framkvæmd þessa verks. Rannsóknir á viðnámi á yfirborði sýndu í framhaldinu að miklu munaði að uppfylltar væru kröfur í útboðslýsingu til verksins. í rannsóknum sem gerðar voru í kjölfarið og enn eru í gangi kemur berlega í ljós að umrætt malbik stóðst ekki útboðskörfur Vegagerðarinnar. Augljóst samhengi er milli þeirra galla og þeirra aðstæðna sem sköpuðust á slysstað,“ segir í yfirlýsingunni og því bætt við að starfsmenn Vegagerðarinnar séu harmi slegnir vegna slyssins.
„Í framhaldi af þessu hafa allir hlutar umrædds verks verið fjarlægðir utan einn sem sannarlega stóðst kröfur til viðnáms. Verkið sem um ræðir var framkvæmt af verktaka með mikla reynslu. Sú reynsla kom því miður ekki í veg fyrir þær afleiðingar sem við öll þekkjum,“ segir í yfirlýsingunni.
Þá segir að Vegagerðin vinni nú að umfangsmikilli endurskoðun á öllum ferlum sem lúta að yfirlögnum á vegakerfinu. „Markmið þeirrar vinnu er að tryggja að slys sem þetta geti ekki komið fyrir aftur,“ segir Bergþóra.