„Gerum Strætó gjaldfrjálsan og föllum frá öllum áformum um borgarlínu,“ segir Baldur Borgþórsson, varaborgarfulltrúi Miðflokksins, í pistli sem birtist á vef Vísis í dag. Þar færir Baldur sín rök fyrir því að það margborgi sig að sleppa því að leggja borgarlínu.
„Jafn ótrúlega og það kann að hljóma, þá má leiða líkum að því að spara megi samfélaginu milljarða á milljarða ofan árlega með því einu að gera Strætó gjaldfrjálsan,“ segir Baldur í grein sinni og bætir við að með því að sleppa borgarlínu geti þetta markmið gengið upp.
„Reikningsdæmið er ekki ýkja flókið: Þrátt fyrir að talsmenn borgarlínu virðist hreinlega ekki vita hvert rekstrarform borgarlínu á að verða eins og dæmin sýna, (á glærusýningum eru ýmist lestarvagnar teinar og tilheyrandi, liðvagnar á hjólbörðum, eða að virðist venjulegir strætisvagnar), þá liggur eitt ljóst fyrir: Lágmarkskostnaður við uppbyggingu sjálfrar línunnar verður 100 milljarðar. Gæti farið í 200 milljarða. Eða 300 milljarða.“
Baldur segir að af fenginni reynslu eigi kostnaðaráætlanir það til að tvöfaldast og jafnvel þrefaldast og því væri óábyrgt að gera ráð fyrir minna en 200 milljörðum.
Baldur bendir á að þetta sé einungis stofnkostnaður, en þá eigi eftir að taka vagnana inn í dæmið. „Erfitt er að henda á reiður á þann kostnað, því ekki hefur fengist afgerandi svar frá talsmönnum borgarlínu hvort þar verði um að ræða lestarvagna,sporvagna liðvagna eða að virðist venjulega vagna. Hér getum við því aftur beitt meðalhófinu og rífandi bjartsýni og reiknað með tuttugu milljörðum.“
Baldur segir að þá sé eftir rekstrarkostnaður borgarlínu og gerir hann ráð fyrir fjórum milljörðum þó talsmenn borgarlínu vilja meina að kostnaðurinn verði lægri. Baldur segir að með bjartsýni og meðalhófi sé þetta niðurstaðan:
Stofnkostnaður línu : 200 milljarðar
Stofnkostnaður vagna: 20 milljarðar
Viðbótar rekstrarkostnaður: 4 milljarðar
Til viðbótar kemur síðan fjármagnskostnaður sem nemur milljörðum á ári.
Baldur segir að rekstrartölur Strætó standi sér og í besta falli munu þær haldast á svipuðu róli áfram eftir tilkomu borgarlínu. Heildartekjur Strætó af fargjaldasölu séu um tveir milljarðar króna á ári, helmingi minni en viðbótar rekstrarkostnaður borgarlínu einnar og sér. Hann leggur fram ákveðnar tillögur og vill að Strætó verði frekar gerður gjaldfrjáls og fallið verði frá áformum um borgarlínu.
„Þannig getum við fjölgað notendum. Þannig getum við sparað 2 milljarða á ári vegna viðbótar rekstrarkostnaðar borgarlínu. Þannig getum við sparað stofnkostnað borgarlínu upp á 200 milljarða. Þannig getum við sparað 20 milljarða stofnkostnað vegna farartækja hver sem þau verða. Þannig getum við sparað fjármagnskostnað upp á milljarða árlega. Í hundrað ár.“
Hér má nálgast grein Baldurs í heild sinni