„Þegar greinin birtist í Morgunblaðinu kom í ljós að umræddur tölvupóstur hafði farið fram hjá bæjarstjóranum og kannast undirritaður einnig við að slíkt hafi gerst hjá undirrituðum.“
Þetta segir Bergur Hauksson lögmaður í grein sem birtist í Morgunblaðinu um helgina.
Hringbraut sagði frá grein sem Bergur skrifaði í Morgunblaðið og birtist þann 7. janúar síðastliðinn. Þar lýsti Bergur heldur ótrúlegu máli sem sneri að umbjóðanda hans, manni sem stundar atvinnurekstur í Hafnarfirði, en honum var gert að brjóta niður veggi sem hann átti ekki.
Til að gera langa sögu stutta hafði maðurinn keypt bátaskýli við Lónsbraut í Hafnarfirði. Búið var að steypa veggi á lóð í eigu Hafnarfjarðar fyrir utan lóðir bátaskýlanna. Það var svo í febrúar í fyrra að eigandi lóðanna fór að fá erindi frá byggingarfulltrúa um að fjarlægja veggina – þó þeir væru ekki á lóð hans.
Málið fór alla leið fyrir Úrskurðarnefnd um umhverfis- og auðlindamál sem komst að þeirri niðurstöðu að vinnsla Hafnarfjarðarbæjar væri haldin annmörkum og voru dagsektir felldar úr gildi. Í bréfi sem Bergur sendi bænum í kjölfarið, bæjarstjóranum nánar tiltekið, kom fram að eigandi lóðarinnar hefði orðið fyrir tjóni og óþægindum og þess krafist að bærinn greiddi bætur. Ekkert svar barst frá bæjarstjóranum sem var tilefni þess að Bergur stakk niður penna og skrifaði um málið
Allt átti þetta sér þó eðlilegar skýringar eins og glöggt kemur fram í grein Bergs sem birtist um helgina.
„Hinn 7. janúar sl. var birt grein í Morgunblaðinu þar sem undirritaður var að kvarta yfir stjórnsýslu Hafnarfjarðar og þar á meðal bæjarstjórans. Meðal þess sem undirritaður kvartaði yfir var að bæjarstjórinn virti hann ekki viðlits, sem kom í ljós að var misskilningur. Þannig er mál með vexti að rétt fyrir jól sendi undirritaður tölvupóst til bæjarstjóra Hafnarfjarðar þar sem hann óskaði eftir að bæjarstjórinn leiðrétti tiltekna stjórnsýslu þar sem starfsmenn bæjarins höfðu ekki farið rétt að við afgreiðslu tiltekins máls. Bæjarstjórinn svaraði ekki tölvupóstinum og gerði undirritaður þá ráð fyrir að hann teldi ekki þörf á leiðréttingu. Þegar greinin birtist í Morgunblaðinu kom í ljós að umræddur tölvupóstur hafði farið fram hjá bæjarstjóranum og kannast undirritaður einnig við að slíkt hafi gerst hjá undirrituðum. Þegar bæjarstjóranum var orðið kunnugt um málið skoðaði hún málið með starfsmönnum bæjarins og komst að þeirri niðurstöðu að leiðrétta bæri þau mistök sem voru gerð. Öll gerum við mistök og þannig mun það verða áfram en á meðan við erum tilbúin að leiðrétta mistök ef möguleiki er á og læra af þeim erum við enn á réttri braut. Það átti við í þessu máli og verður að segja að stjórnsýsla bæjarstjórans hafi verið til fyrirmyndar“