Guðrún Aspelund hefur verið ráðin sóttvarnalæknir við embætti landlæknis frá og með 1. september 2022. Þetta kemur fram í tilkynningu á vef landlæknis.
Þar kemur fram að Guðrún starfar nú sem yfirlæknir á sviði sóttvarna hjá embættinu. Hún hefur embættispróf í læknisfræði frá Háskóla Íslands og sérfræðimenntun í bæði almennum skurðlækningum og barnaskurðlækningum en hún var lektor og barnaskurðlæknir við Columbia-háskóla á árunum 2007 til 2017.
Starfið var auglýst 13. maí síðastliðinn en Þórólfur Guðnason lætur af störfum í byrjun september 2022.
Auglýsingin var birt á Starfatorgi og í fjölmiðlum og var umsóknarfrestur til og með 13. júní. Ekki bárust fleiri umsóknir en frá Guðrúnu.
Atli Fannar Bjarkason, verkefnastjóri vefútgáfu og samfélagsmiðla á Rúv, bendir á þetta í tísti og segir þetta skrýtið.
bara ein umsókn barst um stöðu sóttvarnalæknis sem er skrítið í ljósi þess að rúmlega þriðjungur þjóðarinnar kann að sinna þessu starfi
— Atli Fannar (@atlifannar) June 21, 2022
