Allt ætlaði um koll að keyra á Twitter í gærkvöldi og í nótt þegar Atli Fannar Bjarkason, fjölmiðlamaður og samfélagsmiðlastjóri RÚV, birti skopmynd sem sýnir Brynjar Níelsson, þingmann Sjálfstæðisflokksins, í líki trúðs. Brynjar var gestur Kastljóss á RÚV í gærkvöldi þar sem hann ræddi um „skæruliðadeild“ Samherja með Þórði Snæ Júlíussyni, ritstjóra Kjarnans. Margir voru ósammála málflutningi Brynjars á Twitter.
Atli Fannar birti svo eftirfarandi mynd á Twitter og sagði „kastljósið í kvöld var afhjúpandi“:
kastljósið í kvöld var afhjúpandi pic.twitter.com/W4Nq2J89VM
— Atli Fannar (@atlifannar) May 26, 2021
Gísli Freyr Valdórsson, ritstjóri Þjóðmála og almannatengill, spurði svo:
„Er þetta almenn afstaða hjá starfsmönnum RÚV?“
Atli Fannar spurði hvers vegna hann héldi það og Gísli svaraði:
„Af því að þú ert starfsmaður ríkisfjölmiðilsins og teiknar þingmann XD upp sem trúð á samfélagsmiðlum. Bara að spá hvort við megum eiga almennt von á því í komandi kosningabaráttu.“
Þá svaraði Atli: „Hmm ok. Heldurðu semsagt að allt sem ég segi hér á forritinu sé á einhvern hátt opinber stefna RÚV?“
Gísli sagði að svo væri ekki og honum fyndist Atli Fannar að öllu jafna finnst mjög skemmtilegur á Twitter. „En sama hvaða skoðun Brynjar kann að hafa, þá finnst mér merkilegt að starfsmaður fjölmiðils í eigu ríkisins skuli teikna hann upp sem trúð. Það er því kannski ekki óeðlilegt að spyrja.“
Því svaraði Atli:
„Finnst spurningin reyndar óeðlileg. En það er löng hefð fyrir því að gera grín að stjórnmálafólki á Íslandi, t.d. í skopmyndum prentmiðla eða grínþáttum í sjónvarpi. Viðurkenni að ég bjóst ekki við að einhver mynd hneykslast fyrir hönd Brynjars Níelssonar, af öllum mönnum.“
Karen Kjartansdóttir, almannatengill sagði svo: „Aðeins Sigmund hafði leyfði til að teikna stjórnmálamenn í spaugilegu ljósi. Enginn annar mun nokkur tímann erfa það leyfi.“
Í kjölfarið hjóluðu margir í Gísla Frey fyrir spurninguna og vísuðu í skilorðsbundinn dóm hans í tengslum við lekamálið, en hann var aðstoðarmaður Hönnu Birnu Kristjánsdóttur:
„Fékkstu ekki fangelsisdóm síðast þegar þú ákvaðst að beita þér fyrir málstaðinn?“ Gísli svaraði því ekki.
Aðrir sneru upp á spurninguna, þar á meðal Svala nokkur sem spurði: „Má líta sem svo á að orð Brynjars Níelssonar séu opinber stefna Sjálfstæðisflokksins?“