„Þetta er ekki heimska og sennilega ekki illska heldur, þó ég skilji ekki hvernig fólk sem fórnar heimilum sefur á næturnar. Nei þetta er hagsmunagæsla í sinni verstu mynd – þetta eru svik við fólkið í landinu.“
Þetta segir Ásthildur Lóa Þórsdóttir, formaður Hagsmunasamtaka heimilanna, í aðsendri grein á vef Vísis í dag. Þar gagnrýnir hún stjórnvöld harðlega fyrir að grípa ekki til viðameiri ráðstafana fyrir heimili landsins í kjölfar kórónuveirufaraldursins.
Ásthildur segir að ráðamenn þjóðarinnar séu ekki illa gefið fólk. Miðað við kynni hennar við suma af þeim sem stjórna landinu sé þar á ferðinni hið mætasta fólk.
„En hvað er það þá sem veldur því að í öllum þeim aðgerðum sem ríkisstjórnin hefur þó ráðist í vegna Covid á undanförnum mánuðum, hefur ekki neitt, EKKI EINN HLUTUR, verið gerður til að verja heimili landsins fyrir afleiðingum tekjutaps og atvinnuleysis?“
Hún bendir á að samtökin hafi ítrekað sent áskoranir til ríkisstjórnarinnar um að endurtaka ekki skelfileg mistök bankahrunsins sem urðu til þess að minnst 15 þúsund fjölskyldur misstu heimili sín.
„Við höfum því miður talað fyrir daufum eyrum. Ríkisstjórn Íslands hefur greinilega ákveðið að láta heimilin reka að feigðarósi á meðan hún lítur í hina áttina og passar hina útvöldu.
Ásthildur segir að allar aðgerðir ríkisstjórnarinnar hafi miðað að því að hjálpa fyrirtækjum og þar hafi sum verið frekari til fjárins en önnur.
„Jú, það kemur fjölskyldum og heimilum vel að hafa vinnu og að því leiti má teygja þessar aðgerðir og segja að þær séu fyrir heimilin. En hvað með fjölskyldurnar sem ekki fá vinnu? Hvað með fjölskyldur og heimili sem ráða ekki við skuldbindingar sínar vegna ástands sem þær eiga enga sök á?“
Ásthildur bendir á að yfir 26.000 manns séu á atvinnuleysisskrá og á Íslandi þurfi tvær fyrirvinnur ef vel á að vera og flestar fjölskyldur miða skuldbindingar sínar við það.
„Það er varlegt að gera ráð fyrir að 1/3 þessara fjölskyldna lendi í einhverskonar greiðsluvanda sem jafnvel leiði til heimilismissis. Það eru nærri því 9000 heimili, sem ríkisstjórnin hefur hreinlega „gefið fingurinn“ og sagt að éta það sem úti frýs.“
Ásthildur er þeirrar skoðunar að ríkisstjórnin sé að fórna heimilum landsins fyrir fjármálafyrirtækin, þau sem aldrei fá nóg og allt vilja gleypa.
„Fórnin tókst vel og bankarnir hafa lifað eins og blóm í eggi alveg þar til „of-veiði“ á heimilum landsins fór að segja til sín og stjarnfræðilegur hagnaður þeirra að minnka aðeins á síðustu tveimur árum. Covid er eins og happdrættisvinningur fyrir bankanna sem þegar hafa lagt net sín og bíða eftir að heimilin brotni á flúðunum. Og aftur er það í boði stjórnvalda!“