Áslaug Arna Sigurbjörnsdóttir dómsmálaráðherra vill að refsiramminn fyrir því að dreifa nektarmyndum í leyfisleysi verði hækkaður úr tveimur árum í sex. Í grein sem hún skrifar í Morgunblaðið í dag segir hún að lögreglan muni í næstu viku mæta í grunnskóla til að fræða 8.bekkinga um um mikilvægi samþykkis.
Áslaug setur spurningamerki við spurningu sem borin var upp fyrr í vikunni um dreifingu nektarmynda. „Af hverju senda stúlkur undir lögaldri svona myndir af sér þrátt fyrir umræðuna í fjölmiðlum?,“ var spurningin.
„Spurningin er algeng en hún er til merkis um úrelt viðhorf til kynferðisbrota og þá áherslu að breyta þurfi hegðun þolandans. Okkur hefur þó tekist að eyða þekktum mýtum um að við þyrftum að hylja okkur betur, klæða okkur í síðari kjóla, vera ekki einar, drekka minna eða bara ekki taka mynd með rakt hár til að bjóða ekki hættunni heim á að verða fyrir ofbeldi. Slíkur málflutningur fær sem betur fer minni hljómgrunn en áður,“ segir Áslaug og vísar þar til Ragnars Önundarsonar sem gagnrýndi hana fyrir að birta mynd af sér með rakt hár.
Ætlar hún að fylgja eftir breytingum á barnaníðsákvæði almennra hegningarlaga sem ekki náði fram að ganga á síðasta þingi:
„Þar er um að ræða löngu tímabærar úrbætur sem felast meðal annars í verulegri rýmkun refsirammans, breyttri hugtakanotkun og skýrari greinarmun á mörkum kynferðislegra samskipta og kynferðisbrota. Með þeim breytingum eru tekin mikilvæg skref til að vernda börn betur gegn stafrænum birtingarmyndum kynferðislegs ofbeldis. Meðal annars með því að hækka refsirammann úr tveimur í sex ár eru send skýr skilaboð um alvarleika þessara brota.“
