Áslaug Arna Sigurbjörnsdóttir dómsmálaráðherra gagnrýndi Þórólf Guðnason sóttvarnarlækni harkalega í viðtali á Bylgjunni í gær. Tilefnið voru ummæli Þórólfs í viðtali við Fréttablaðið í gær.
Þar sagði Þórólfur að hann vilji ekki slaka of mikið á þeim takmörkunum sem í gildi eru sökum inflúensu og RS vírusins. „Það var engin inflúensa í fyrravetur og ef hún kemur núna verður það af meira afli en venjulega. Það að hún komi reglulega eykur ónæmi í samfélaginu en fyrst hún kom ekki í fyrra.“
Nú eru hins vegar 75 prósent þjóðarinnar fullbólusett við Covid-19 og finnst því mörgum ærið tilefni til þess að létta á takmörkununum. Sér í lagi í ljósi þess hve fáir eru inniliggjandi á sjúkrahúsum vegna Covid og veikindi virðast vægari.
Áslaug Arna er ein af þeim. Hún segir að við séum komin á „hættulega braut með slíkum rökstuðningi“ líkt og Þórólfur nefndi í viðtalinu. Bætir hún við að það sé aldrei réttlætanlegt að grípa til svona íþyngjandi takmarkana.
„Þó okkur finnist þær ekki takmarkandi miðað við hvað við höfum upplifað, þá er það samt þannig að þær hefta atvinnufrelsi fólks og skólagöngu og hefur ýmis áhrif inn í samfélagið. Það er ekki hægt að rökstyðja slíkar takmarkanir með hefðbundinni flensu og áhrifum hennar. Við höfum upplifað það á hverju einasta ári og við getum ekki gripið til þannig raka til þess að styðja íþyngjandi takmarkanir,“ segir Áslaug í viðtalinu á Bylgjunni.
Í færslu á Twitter frá því í gær tekur Áslaug afar stuttlega saman þau skilaboð sem hún vildi koma til skila varðandi sóttvarnarmál. Þar sagði hún: „Það er ekki í lagi að rökstyðja takmarkanir á frelsi fólks með inflúensu og RS virus. Afléttum öllu.“ Einföld skilaboð frá dómsmálaráðherranum.
Ég ræddi um áfengismál og covid takmarkanir á Bylgjunni í dag.
— Áslaug Arna Sigurbjörnsdóttir (@aslaugarna) October 13, 2021
Í stuttu máli: a) hættum kreddum og forsjárhyggju í áfengismálum og lögum þetta í takt við tímann. b) það er ekki í lagi að rökstyðja takmarkanir á frelsi fólks með inflúensu og RS virus. Afléttum öllu. https://t.co/XaQVpszv6H
