„Það verður bara að segjast að sjónvarpsstöðvarnar og Netflix eru að bjarga geðheilsunni nú þegar ekkert má gera og ekkert má fara,“ segir Ásdís Ásgeirsdóttir, blaðamaður á Morgunblaðinu, í ljósvakapistli sínum á sjónvarpssíðu blaðsins í dag.
Eftirspurn eftir góðu sjónvarpsefni hefur trúlega sjaldan verið meiri en einmitt nú. Ásdís segir að hún sé smátt og smátt að breytast í sjónvarpssjúkling nú þegar ekki er hægt að sækja leikrit, tónleika eða fara í matarboð.
„Nýlega datt ég inn í seríurnar Suits, með Meghan Markle, nú giftri Harry Bretaprinsi, í aðalhlutverki. Seríurnar eru níu og er ég um það bil hálfnuð, þannig að nóg er eftir af lögfræðidrama! Svo reyni ég eftir fremsta megni að fylgjast með Ráðherranum á RÚV. Ég get ekki enn ákveðið hvort þátturinn sé góður eða slæmur,“ segir hún.
Ráðherrann hefur notið töluverðra vinsæla hér á landi og þykir eflaust flestum þeim sem enn horfa þættirnir vera góðir. Ásdís segir að mikið hafi verið lagt í þættina og í þeim sé valinn maður í hverju rúmi. Þó að sumir séu búnir að gefast upp sé hún enn að horfa og er hún ekki frá því að þættirnir fari batnandi.
„En sumt gengur ekki alveg upp. Aðalpersónan, sem Ólafur Darri reyndar leikur snilldarvel, hefur fulllítið vit á stjórnmálum, sjálfur forsætisráðherrann. Og mögulega er fólk í maníu svona undarlega barnalegt, þótt ég efist um það. Þrátt fyrir allt styð ég íslenskt sjónvarpsefni alla leið og mun halda áfram að horfa,“ segir hún.