Arnar Þór Viðarsson, landsliðsþjálfari íslenska karlalandsliðsins í knattspyrnu opinberaði í dag hóp landsliðsins sem mætir til leiks í Þjóðadeild UEFA í næsta mánuði. Stór nöfn vantar í íslenska hópinn og vekur athygli að Aron Einar Gunnarsson er ekki í hópnum.
„Ég er búinn að tala við marga af þeim sem eru ekki í hópnum. KSÍ gaf út fréttatilkynningu í dag með ákvörðun stjórnar. Það er léttir fyrir mig, ég hef kallað eftir ramma til að fara eftir frá því í september," sagði Arnar á blaðamannafundi í dag enfotbolti.net greinir frá.
„Það hefur ekki verið skemmtilegt að sigla framhjá ákveðnum hlutum. Aron Einar fellur enn undir þessari ákvörðun stjórnar. Ég sem þjálfari vinn bara undir þessum verkreglum," bætti hann við.
Héraðssaksóknari ákvað fyrr í þessum mánuði að fella niður rannsókn á kynferðisbrotamáli gegn Aroni Einari Gunnarssyni og Eggerti Gunnþóri Jónssyni.
Fréttablaðið greindi frá því í síðustu viku að Vanda Sigurgeirsdóttir, formaður KSÍ, hefði ekki rætt við Aron Einar Gunnarsson eftir að héraðssaksóknari felldi málið niður.
Að sögn Vöndu væru engar reglur sem banna Arnari Þór Viðarssyni að velja Aron í næsta verkefni karlalandsliðsins.
Uppfært 14:43: Fréttablaðið greindi frá því hálf þrjú í dag að konan sem kærði og sakaði knattspyrnumennina Aron Einar Gunnarsson og Eggert Gunnþór Jónsson um nauðgun árið 2010 í Kaupmannahöfn hefur kært niðurstöðu dómstóla um að fella málið niður. Þetta staðfestir Ómar Smárason, deildarstjóri samskiptadeildar KSÍ í samtali við Fréttablaðið.
