Arnar Grant, einkaþjálfari í World Class, Hreggviður Jónsson, stjórnarformaður og aðaleigandi Veritas, og Ari Edwald, framkvæmdastjóri Ísey útflutnings, hafa allir brugðist við í dag eftir ásakanir Vítalíu Lazareva. Vítalía steig fram í hlaðvarpsþættinum Eigin konur á dögunum og lýsti ofbeldi sem hún sagðist hafa orðið fyrir, meðal annars í sumarbústaðarferð.
Hreggviður tilkynnti í dag að hann hefði ákveðið að stíga til hliðar úr stjórn fyrirtækisins og stjórnum tengdra fyrirtækja, í kjölfar ásakana Vítalíu Lazareva. Fyrr í dag var greint frá því að Ari Edwald, framkvæmdastjóri Ísey útflutnings, væri kominn í leyfi. Vísir greindi svo frá því að Arnar Grant væri kominn í leyfi frá störfum og vísaði Vísir í skriflegt svar frá Birni Leifssyni, eiganda World Class.
„Ég harma að hafa ekki stigið út úr aðstæðum sem ung kona hefur skýrt frá og fjallað hefur verið um í sumum fjölmiðlum. Það er afar þungbært að heyra um hennar reynslu. Ég lít þetta mál alvarlegum augum og þrátt fyrir að ég hafi ekki gerst brotlegur við lög þá mun ég stíga til hliðar úr stjórn Veritas og stjórnum tengdra fyrirtækja til að raska ekki þeirra mikilvægu starfsemi,“ sagði í yfirlýsingu frá Hreggvið í dag.
Vítalía lýsti atvikinu sem átti sér stað í sumarbústað í desember 2020 meðal annars á samfélagsmiðlum. Var Vítalía í sambandi með einum mannanna og lýsti hún atvikinu, sem hún sagði hafa átt sér stað í heitum pott meðal annars með þessum orðum:
„Þetta fór alveg yfir öll mörk sem hægt var að fara yfir. Fólk áttar sig ekki á því hversu stórt þetta var, margir halda að þetta hafi verið „bara“ þukl en þetta fór yfir öll mörk hjá öllum.“
Í fréttStundarinnar í dag kom fram að Ari Edwald hefði sjálfur óskað eftir því að fara í leyfi frá störfum. Haft var eftir Elínu Margréti Stefánsdóttur, stjórnarformanni Ísey, að um tímabundna ráðstöfun væri að ræða en framhaldið myndi ráðast á næstunni.
