Afar skondið atvik átti sér stað í Silfrinu með Agli Helgasyni á RÚV í morgun er hann var að afkynna gesti sína í liðnum vettvangur dagsins.
Egill hóf þáttinn með umræðum þar sem mætt voru Björn Ingi Hrafnsson, Friðjón R. Friðjónsson, Karen Kjartansdóttir og Björn Þorláksson til þess helst að ræða yfirvofandi borgar- og sveitastjórnarkosningar og síviðvarandi covid ástandið.
Þegar Egill var að afkynna gesti sína um miðbik þáttarins vildi ekki betur til en svo að hann velti drykkjarmáli um koll þannig að úr lak gamalt leyndarmál. „Jæja sullaði ég?“ sagði Egill sem hélt ró sinni og gerði umsvifa- og fumlaust játningu sem hann gaf til kynna, með léttleikandi látbragði, að best væri að færi ekki hátt: „Það er kók í þessu glasi. Usssssss.“
Gestir þáttarins hlógu létt að atvikinu. „Áratugaleyndarmál, ég drekk kók í Silfrinu,“ sagði Egill áður en hann vatt sér beint í auglýsingar.
Myndband af atvikinu má sjá hér að neðan.