„Við erum ótrúlega lánsöm að eiga björgunarsveitarfólk að, en auðvitað er eitthvað öfugsnúið við að við reiðum okkur á sjálfboðavinnu fólks fyrir sjálfsagða innviði,“ segir Anna Sigrún Baldursdóttir, framkvæmdastjóri skrifstofu forstjóra Landspítala og bakþankahöfundur Fréttablaðsins, í pistli á baksíðu blaðsins í dag.
Þar gerir hún eldgosið í Meradölum að umtalsefni og verkefni björgunarsveita samhliða gosinu. Gosið fangar athygli Íslendinga sem og erlendra ferðamanna sem eru hér á landi og vilja margir berja gosið augum. Það hefur haft í för með sér stóraukið álag á björgunarsveitir sem sinna starfi sínu í sjálfboðavinnu.
„Eðlilega fagna ferðaþjónustuaðilar möguleikum til vaxtar eftir erfið ár þótt helst sé að skilja á einhverjum fulltrúum greinarinnar að eldgosið hafi nú ekki komið á heppilegum tíma því Ísland var uppselt. Jarðskorpunni verður væntanlega sent minnisblað með tilmælum um að tímasetja óróa sinn betur,“ segir Anna.
Hún bætir við að ferðamennirnir láti sig samt hafa það að nýta sér að nú gýs, þó að þeir hafi ekki pantað sér frí hér í tilefni jarðhræringa. Bendir hún á að eins og svo sem ýmsir landar okkar fari þeir vanbúnir á gallabuxum og strigaskóm í sína svaðilför.
„Og hvað gerum við þá til að vernda líf og limi þessara gesta? Jú, teflum fram björgunarsveitafólki án valdheimilda í sjálfboðavinnu. Þessu fólki er ætlað að hvetja ferðalanga til að fara sér nú ekki að voða, en fólki er það auðvitað í sjálfsvald sett. Það er svo þetta sama björgunarsveitafólk sem gengur yfir urð og grjót til að bera slasaða ferðalanga niður aftur í þoku og sudda.“
Anna Sigrún segir að við séum ótrúlega lánsöm að eiga björgunarsveitarfólk að, en auðvitað sé eitthvað öfugsnúið við að við reiðum okkur á sjálfboðavinnu fólks fyrir sjálfsagða innviði.
„Með auknum ferðamannastraumi hefur reynt verulega á ýmsa innviði án þess að því hafi verið mætt af nægum krafti. Þetta gildir um vegakerfið okkar, löggæslu og ýmiss konar eftirlit og að ég tali nú ekki um heilbrigðisþjónustuna. Þetta er ekki sjálfbær nálgun og verður ekki mætt með flugeldasölu og sjálfboðavinnu heldur eðlilegu framlagi í sameiginlega sjóði. Þannig er það nú bara.“