Anna Kristjánsdóttir, íbúi á Tenerife, hefur gaman að því að nudda fylgjendum sínum á Facebook upp úr þeirri staðreynd að hún er búsett á suðrænum slóðum.
Nú þegar nokkrir dagar eru eftir af októbermánuði er farið að kólna, sérstaklega á norðurslóðum, þó hitinn lækki ekki ýkja mikið við miðbaug. En Anna segir að hún finni mun.
„Ég vaknaði klukkan 4 í nótt til að pissa og það var ískalt inni hjá mér, ekki nema 19°C hiti og ég þurfti að fara inn í skáp og sækja sængina mína sem hafði verið geymd þar síðan snemma í vor. Veit almættið ekki að við erum í Paradís?“
Klukkunni var breytt á dögunum og það þýðir að nú er orðið dimmt klukkutíma fyrr á kvöldin en áður.
„Það þýðir að það reynir á kuldaþol Íslendingsins á barnum á kvöldin nema að flíspeysan sé höfð meðferðis. Það gekk samt bærilega á sunnudagskvöldið, en það líður vart á löngu uns ég neyðist til að berja klaka af svalahandriðinu þegar hitinn fer niður fyrir 18°C á nóttunni. Við skulum samt vona að það verði smátími í slíkar aðgerðir enda október ekki liðinn. Og ég bý að auki nær jörðu en síðasta vetur. Nýliðin nótt bendir ekki til að svo verði og ég neyðist brátt til að sofa í vaðmálsnáttkjól með dúnsæng yfir mér,“ segir Anna sem endar færsluna á þessum orðum:
„Ég læt mig dreyma um að vera komin suður til Grænhöfðaeyja. Þær eru að minnsta kosti nær miðbaug og ætti því að vera hlýrra á þeim slóðum.“