Anna Kristjánsdóttir sem búsett er á Tenerife hefur lent í ófáum ævintýrum eftir að hún flutti á eyjuna fögru fyrir nokkrum misserum.
Hún heldur fylgjendum sínum á Facebook upplýstum um gang mála og að undanförnu hefur hún leitt þá í allan sannleikann um það hvernig það er að vera með stóran hund á heimilinu. Hundurinn Texas El Perró, sem er í eigu systur hennar, var í pössun hjá henni í ellefu daga og ef marka má færslu Önnu í morgun ætlar hún aldrei að eignast stóran hund sjálf.
„Ellefu daga þrotlausri vinnu með hund er lokið,“ segir Anna sem kveðst lifa nú í sæludraumi en jafnframt horfa með vorkunnsemi á þá hundaeigendur sem eru að reyna að láta hundana sína gera stykkin sín áður en farið er heim að sofa.
„Sjálf fæ ég að neyta morgunmatarins í friði án þess að Snati reyni að éta hann frá mér,“ segir Anna sem kveðst finna að stórir hundar verði aldrei hluti af hennar fjölskyldu.
„Enda var ég dauðþreytt eftir þessa ellefu daga. Þvílík vinna að hugsa um svona stóran hund í ellefu daga. Núna ætla ég að njóta þess að sofa út, drekka morgunkaffið á réttum tíma og setja inn pistlana mína fyrir klukkan níu án þess að slefandi hundur sé að ritskoða yfir axlirnar á mér. Með þessum orðum votta ég eigendum stórra hunda alla mína samúð.“
