„Getur verið að endirinn verði að aðstandendur verði að flytja látinn ástvin til útlanda til þess að uppfylla hinstu ósk viðkomandi?“
Þessari spurningu varpar Anna Kolbrún Árnadóttir, þingmaður Miðflokksins, fram í aðsendri grein í Morgunblaðinu í dag. Þar skrifar hún um bálfarir og bendir á að fleiri og fleiri velja bálför við andlát. Er nú svo komið að um 40% kjósa bálfarir og hefur þeim fjölgað á liðnum árum.
Anna Kolbrún bendir á að bálstofan í Fossvogi sé eina bálstofan í landinu. Hún sé rekin á undanþágu bæði frá Vinnueftirlitinu og Heilbrigðiseftirlitinu.
„Sagt var frá því í fjölmiðlum seint á síðasta ári að hætta væri á því að brennsluofnarnir gætu fallið saman enda eru þeir rúmlega 70 ára og brýn þörf á að endurnýja þá ef ekki á að fara illa. Bent hefur verið á að það stefni í algert óefni, viðvaranir hafa verið gefnar en enn þá hefur ekki verið brugðist við eða með öðrum orðum: reynt hefur verið að vekja athygli á alvarlegri stöðu án árangurs.“
Anna Kolbrún segir að eins og staðan er núna standi bálför ekki öllum landsmönnum til boða nema þá með ærnum flutningskostnaði. Þess vegna komi ekki á óvart að talsverður munur sé á því eftir búsetu hvort fólk velur hefðbundna útför eða bálför, fleiri búsettir á höfuðborgarsvæðinu kjósa bálför.
„Það skal þó sagt að íbúar landsbyggðar þurfa ekki að greiða fyrir bálförina sjálfa en það breytir ekki því að eina bálstofa landsins er í Reykjavík og það liggur því töluverður aukakostnaður í því að flytja kistu þangað annars staðar frá af landinu. Það er í höndum aðstandenda að flytja kistuna eða fá annan aðila til þess. Ef kista fer í flug frá Akureyri til Reykjavíkur kostar það um 45 þúsund krónur og svo bætist við kostnaður við flutning frá flugvelli til líkhúss,“ segir Anna Kolbrún sem endar pistil sinn á þessum orðum:
„Stjórnvöld verða að hlusta á aðvaranir, setja verður upp viðunandi og löglega aðstöðu til bálfara á fleiri en einum stað á landinu. Það þarf ekki allt suður.“