Hér eru á ferðinni undur ljúffengir smjördeigssnúðar með skinku og osti. Þetta er alvöru djúsí bakkelsi og er sniðugt hvort sem heldur með kaffinu eða í nesti í ferðalagið eða í pikknikk körfuna. Það er engin önnur er Berglind Hreiðars köku- og matarbloggari á Gotterí og gersemar sem býður okkur uppá þessa bræðinga þar sem bræddur osturinn og majónesið setja punktin yfir i-ið. Berglind féll strax fyrir þessum og segir að þessa verði allir að prófa.
Smjördeigssnúðar
Um 15 stykki
Tilbúið smjördeig (5 plötur/430 g)
300 g skinkukurl
60 g rifinn cheddar ostur
60 g rifinn mozzarella ostur
90 g Hellmann‘s majónes
1 msk. hunangs Dijon sinnep
½ tsk. salt
¼ tsk. pipar
20 g brætt smjör
Birkifræ
- Hitið ofninn í 180°C.
- Affrystið smjördeigið og raðið plötunum þétt upp við hvor aðra og klemmið hliðarnar á plötunum saman eins og þið getið. Gott að setja smá vatn á fingurna til að deigið festist betur saman.
- Setjið annan bökunarpappír yfir og snúið deiginu við, klemmið nú saman á hinni hliðinni með sama hætti.
- Næst má hræra saman majónesi, sinnepi, salti og pipar og smyrja yfir deigið.
- Stráið síðan skinku og osti jafnt yfir allt og rúllið upp í lengju.
- Skerið niður í um 2 cm þykka snúða, raðið á bökunarpappír á bökunarplötu og klemmið endann við eins og þið getið svo hann muni ekki standa út í loftið þegar búið er að baka snúðana, hér er líka gott að setja smá vatn á fingurna.
- Penslið með bræddu smjöri og bakið í um 22 mínútur eða þar til snúðarnir eru farnir að gyllast á köntunum.
Berið fram á fallegan hátt eða takið með í ferðalagið, pikknikkið eða hvaðeina sem ykkur hentar og njótið.
Girnilegir þessir smjördeigssnúðar sem bræða hvern þann sem prófar./Ljósmyndir Berglind Hreiðars.
